ORANJESTAD – Diabierna 16 december 2022, fraccion Accion 21 hunto cu coleganan di fraccion MAS, Marisol Lopez-Tromp y Aquanette Gunn y colega di fraccion RAIZ, Misha Raymond, a entrega un inciativa di ley pa habri matrimonio pa parehanan di mesun sexo. E concepto di ley a ser entrega na Presidente di Parlamento y a sigui di biaha pa Raad van Advies.
Den cuadro cu e Vonnis cu a sali for di Hof declarando cu parehanan di mesun sexo tin mesun derecho pa casa bao di nos constitucion, lider di fraccion Accion 21, Miguel Mansur ta un di e promenan pa bini dilanti y expresa di ta hopi agradeci pa loke tabata e tremendo trabao haci pa entre otro Fundacion Orguyo, y tur otro cu semper a para fuerte den e lucha pa derechonan igual.
Sr. Mansur ta splica cu si e Vonnis bira definitivo e inciativa di ley lo ta codificacion di e sentencia di Hof. Den caso cu gobierno bay Cassatie y e Vonnis no bira definitivo, e iniciativa di ley aki entrega na Parlamento di Aruba pa fracionnan Accion 21, MAS y RAIZ lo ser debati den Parlamento prome mita di aña 2023.
Tin varios punto esencial cu ta describi den detaye den e Memorie Van Toelichting [OLV] Landsverordening Openstelling Huwelijk entrega na Staten. Punto 4.3, Psychosociale Aspecten ta describi por ehempel cu hopi estudio a wordo haci cu legalisacion y sosten di matrimonio di parehanan di mesun sexo tin un efecto positivo na e salud y bienestar di gruponan minoritario dentro di un comunidad. Adicionalmente esaki ta promove e integracion di e gruponan aki dentro di un comunidad.
Despues di Hulanda, un cantidad grandi di paisnan rond mundo a sostene matrimonio di parehanan di mesun sexo den cuadro cu trato igual. Paisnan incluyendo Alemania, Argentina, Australia, Austria, Belgica, Brazil, Canada, Colombia, Chile, Costa Rica, Ecuador, Dinamarca, Finland, Hulanda, Irlanda, Islandia, Luxembourg, Malta, Mexico, Merca, New Zealand, Noruega, Portugal, Reino Unido, Spaña, Sweden, Suisa, Sur Africa, Taiwan, Uruguay y Zwitserland ya caba ta ofrece matrimonio pa parehanan di mesun sexo.
E topico aki ta uno sigur cu tin su controversia pero no mester ta uno pa promove mas division dentro di nos comunidad. Hunto nos tur tin e capacidad pa bini na otro y compronde con nos constitucion ta traha, y con nos tur por biba bon cu otro sin depriva ningun hende di nan derechonan civil. Accion 21 semper a boga y bringa pa stop cu discriminacion y promove conscientisacion, como tambe educacion.
E iniciativa di ley aki a wordo entrega na Parlamento y awor ta bay over na sigui cu e siguiente pasonan pa trata esaki mientras e proceso ta sigui cana, sperando ainda e posicion cu Gobierno di Aruba lo tuma pa cu esaki.