Diahuebs, 15 di december, mainta a lansa e campaña di microchipping cu e colaboracion di 5 veterinario di Aruba cual lo keda encarga cu e servicio di chipping di cada cacho y consulta. E prijs durante e campaña aki ta costa e doño di mascota solamente AFL 25,- Florin pa cada cacho. Gobierno ta subsidiando e microchipsnan aki pa asina reduci e prijs pa haci esaki mas pagabel pa e comunidad di Aruba. Un total di 5 mil chip lo wordo reparti bou di e veterinarionan den e prome parti di e campagna.
E problematica di e populacion grandi di cacho y pushi aki na Aruba ta algo cu nos tin hopi aña ta purba combati. Entre otro a bin cu e NPSA, “plan nacional pa animal riba caya” cu ta ancra na e “Ley di Cacho”. Den cuadro di esaki Ministerio di Naturalesa ta trahando duro pa reenforsa e ley exisitente aki. Tin varios aspecto na e problema, pero esun mas importante ta e comportacion iresponsabel di e doñonan.
Como doño nos no tin solamente un responsabilidad cu nos mascota pero tambe un responsabilidad civico y percura cu barionan ta safe y dushi pa biba pa tur habitante. Diariamente ta ricibi kehonan di molester di cachonan cu ta cana los – y nos no por culpa e cacho.
Pues e ta hopi importante cu cada doño di cacho ta na altura di su responsabilidad pa cu su mascota. Pa por continua na ehecuta e ley di cacho den un forma efectivo nos ta cuminsa “tackle” e problematica di e sobre-populacion. E forma cu lo haci esaki ta cu lo introduci un database central cu lo fungi pa registra tur mascota ariba nos isla. E registracion aki ta mara na e microchipping di cada mascota.
Un database centralisa lo duna nos un bista di e cantidad di cachonan cu tin na Aruba, y tambe informacion di rasa, genero, e doño y e area cu e mascota ta residencia. Microchip tin su beneficio si un cacho perde; e por wordo haya mas lihe door di instancianan responsabel y treci bek cerca su famia. Esaki ta conta muy en especial pa e temporada di fin di aña, caminda clapchi ta causa cu hopi cacho ta keda perdi.
Pa registra un mascota lo mester acudi ariba e website (www.arubapetregistry.com) y scoge un veterinario preferi pa por haci un afspraak pa microchip e cacho. Ta bay tin informacion disponibel na tur veterinario cu ta colaborando den e campaña aki y tambe ariba Facebook page @Animal Pet Registry.
Minister Arends a haci entrega di e prome batch di microchips pa e veterinario Nathalie Booi di Animal care Clinic cu taambe tabata presente den nomber di e asociacion di veterinario cu lo ta colaborando cu nos den e campaña aki.