MINISTER ENDY CROES A REUNI CU DEPORTISTANAN DI MOUNTAIN BIKE

Recientemente, Minister Endy Croes a reuni cu e morochonan, Loren y Tiffany Muffat-Meridol. Nan ta practica e deporte di Mountain bike y ta forma parti di Federacion di Ciclista na Aruba. E hobennan ta desea di participa den diferente campeonato internacional di Internationale Wielerunie e aña binidero. Internationale Wielerunie (UCI) ta un organisacion internacional di ciclismo, reconoci pa International Olympic Committee (IOC). El a wordo funda dia 14 di april na aña 1900 na Paris, Francia y tin un cantidad di 202 Federacion Nacional. Loren y Tiffany ta hobennan deportista cu hopi entusiasmo pa logra nan soñonan. Minister Endy Croes a tuma nota di nan proyectonan y na momento cu Minister di Deporte ricibi nan carta di e forma oficial, lo sondeo posibilidad pa evalua den ki forma por duna e hobennan sosten. Minister Endy ta desea e rumannan tur clase di exito y ta positivo cu a traves di nan disciplina, determinacion y dedicacion, nan lo cumpli nan metanan.