ORANJESTAD – Awe merdia a sigui cu caso Avestruz caminda abogado mr. Illes di Sussebeek, ta haya cu Ministerio Publico ta purba pintra Sussebeek di a cumpra Sevinger pero no ta asina.
SUSSEBEEK Y SEVINGER TA AMIGO DI HOPI AÑA
E abogado a bisa Hues cu Sussebeek y Sevinger ta amigo pa hopi aña. Sussebeek tin diferente compania cu a haci peticion pa tereno erfpacht. El a yuda Sevinger cumpra materialnan pa construccion. Tambe cu el a haci donacion na e fundacion. E abogado a remarca cu un minister por tin amigo. Esey no ta un delito. Tur hende por haci peticion pa tereno. Tur hende por gana placa. Tur hende por yuda otro. El a enfatisa cu amigo no ta cumpra su amigo.
SUSSEBEEK NO A CUMPRA SEVINGER
Mr. Illes a bisa cu e ta haya cu Ministerio Publico (Min. Publ.) ta pinta Sussebeek malo door cu e ta amigo di Sevinger y cu Sussebeek a cumpra Sevinger. El a bisa cu Min. Publ. mester demostra cu Sussebeek a cumpra Sevinger y mr. Illes ta haya cu esey no ta e caso. E abogado ta haya cu mester declara Sussebeek liber.
NO A DUNA PREVILEGIO
E abogado ta haya cu Min. Publ. a tuma un postura cu no ta neutral. El a bisa cu Min. Publ. ta presenta situacionnan pero no ta bisa tur e berdad. Segun Min. Publ. un minister no por scoge su hendenan di confianza. Na opinion di e abogado, e hecho cu minister ta haci anotacion riba peticion di tereno pa DIP haci e trabaonan na mester wordo mira como instruccion. El a mustra cu e director di DIP tin e responsabilidad pa evalua e cartanan di minister. E ta haya cu e cartanan di minister ta mas bien su deseo. No ta asina cu Sevinger a duna Sussebeek un posicion previlegia.
Sevinger no tabata sa cu ta companianan di Sussebeek a haci peticion. El a trata tur compania igual cu a haci peticionnan pa tereno. No ta asina cu Sevinger a duna previlegio na Sussebeek. El a mustra cu Hues a yama Sevinger un machine di stempel pa dunamento di tereno. E abogado a bisa cu esey ta mustra cu Sevinger kier a yuda tur comerciante cu kier realisa un proyecto.
Mr. Illes a mustra cu Sussebeek tabatin contacto cu e ex minister Marisol Lopez Tromp tempo cu e tabata minister pa haya tereno y esey a bay sin problema. El a remarca, pakico cu Lopez Tromp no ta previlegia y cu Sevinger si.
REALISA PROYECTO EXITOSO BANDA DI HOTEL
E abogado a mustra cu Sussebeek a dedica su mes na reconstruccion di casnan y edificionan. El a mustra cu Sussebeek a traha La Hacienda banda di hotelnan. El a tuma e curashi y e proyecto ta un exito cu tin un balor di 30 miyon florin.
Min. Publ. ta acusa cu Sussebeek a haya terenonan hopi valioso. El a reta Min. Publ. pa presenta cu raport di taxaccion di terenonan cu Sussebeek a haya.
Segun mr. Illes, Min. Publ. no ta bisa e berdad den e caso pa cu peticion di terenonan di companianan di Sussebeek. Tabatin casonan cu a bay para te den Corte pa cu terenonan caminda e companianan a gana nan caso contra Gobierno cu kier a kita erfpacht.
AMIGO NO TA CUMPRA AMIGO
Na opinion di mr. Illes, e acusacionnan di Min. Publ. no ta proba cu Sussebeek a cumpra Sevinger. Donacionnan pa campaña politico ta algo normal. Hopi comerciante y compania ta haci donacionnan na partidonan politico. Contrario cu Hulanda, Gobierno no ta subsidia partidonan politico. Sussebeek a haci donacion na Fundacion Curazon Nobo. Sussebeek a haci donacion pasobra e ta kere den e programa presenta pa AVP.
E machine di gym no ta un gym completo manera cu Min. Publ. ta pretende. Investigacion di Landsrecherche ta mustra cu Sevinger a cumpra e machine na Merca y e transportaccion di e machine a sosode via compania di Sussebeek. Sevinger ariba peticion di Sussebeek a busca un machine di gym pa Sussebeek. Pesey e pedida ta riba nomber di Sevinger pero e gym ta pa Sussebeek. A resulta cu e machine ta mucho grandi pa e espacio na cas di Sussebeek. Pesey Sussebeek a laga su amigo Sevinger pone e machine di gym na Sevinger su cas temporal te ora e construccion di e cuarto keda cla. E abogado a bisa cu door cu nan ta amigo, a haci esaki. Esey no tin nada di haci cu cumpra. Landsrecherche kier pinta esaki como cumpramento pero esey no ta asina.
NO A REGALA MATERIAL DI CONSTRUCCION
E abogado a bisa cu e gastonan di construccion na cas di Sevinger, no ta manera Min. Publ. ta pint’e como un regala di Sussebeek. Sussebeek a cumpra cierto materialnan pa Sevinger pasobra e tin compania di construccion y tin cuenta cu un compania di transporte di Miami pa Aruba. El a cumpra materialnan na Miami pa Sevinger. Esaki ta ayudo di amigo pa otro pero Landsrecherche ta pinta esaki como Sussebeek a cumpra Sevinger. E abogado a bisa cu tin palabracion cu Sevinger ta paga Sussebeek bek. E gastonan di traha e jardin di Sevinger ta algo mas di 25 mil florin y den tres pago, Sevinger a paga esaki bek na Sussebeek.
Tambe Sussebeek a traha heki rond di cas di Sevinger pa evita cu hendenan ta bin mainta tempran na cas di Sevinger pa pidi ayudo. Ariba conseho di Sussebeek, a laga traha esaki na Miami. Sevinger a paga un parti y Sussebeek a paga un parti. Despues Sevinger a paga Sussebeek bek.
E abogado a sigui bisa cu Sevinger a duna Sussebeek placa pa laga busca cosnan pa renovacion di cas di Sevinger. El a mustra riba screen e balansa di pago di Sevinger na Sussebeek. El a bisa Hues cu door di amistad, no por considera loke Sussebeek a haci pa Sevinger como regalo. E ta haya cu mester declara Sussebeek liber.
Abogado a mustra cu henter e procedura pa cu proyectonan di companianan di Sussebeek, DIP a duna aprobacion. El a mustra cu tin proyecto cu despues di un aña cu Sevinger a firma, esaki a wordo trata pa DIP.
E abogado a mustra cu for di 2004, Sussebeek a haci peticion na Minister Lopez Tromp pa tereno den vecindario di waf. Despues na 2008 atrobe a haci peticion y despues a logra haya e tereno. Na 2015, Harms a haci oferta na Sussebeek y Sussebeek a bende esaki. E placa a wordo deposita riba un cuenta na banco na Curacao. E abogado a bisa cu esaki ta completamente legal. E ta haya cu mester declara Sussebeek liber.
MESTER DECLARA SUSSEBEEK LIBER
E abogado a conclui cu no tin prueba cu Sussebeek a duna regalo of cumpra Sevinger. Tampoco no tin prueba di cu Sevinger a previlegia Sussebeek. E abogado ta haya cu inhustamente Min. Publ. ta acusa Sussebeek di a cumpra, a regala Sevinger cosnan. E abogado a bisa Hues cu amigo no ta cumpra su amigo. E ta haya cu mester declara Sussebeek liber.
Pa loke ta e acusacion di labamento di placa, e abogado ta haya cu no tin ningun prueba y mester declara Sussebeek liber. E placa deposita na banco na Curacao no ta labamento di placa sino bende e tereno na Harms.