ORANJESTAD – Diahuebs den oranan di mainta a firma un acuerdo di cooperacion (MOU) entre Ministerio di Turismo y Salud Publico, HOH, ImSan y AZV. Minister Oduber a señala cu ta pa prome biaha den historia e instituto di HOH y ImSan ta bay traha hunto intensivamente.
E MOU aki lo bay yuda na mehora e servicio y e calidad di cuido na Aruba, banda di esaki e MOU aki ta haci cu Aruba ta cumpli cu e Landspakket poni pa Hulanda. Cu e acuerdo firma aki HOH y ImSan ta bay traha hunto na un manera mas eficiente pa duna un mihor cuido na nos comunidad y pa mantene nos fondo di AZV sostenibel.
E firmantenan di e MOU importante y historico aki tabata Minister di Turismo y Salud Publico Sr. D.P. Oduber, B.Ec – E president di Raad van Bestuur HOH, drs. J.E.M. Vroegop – E director ImSan, drs. J.R. Rajnherc, kinderarts y e director AZV, ir. E.M. Jacobs.
E mandatario a trece dilanti cu e ta contento di e profesionalismo y calidad di cuido cu HOH y ImSan ta duna na nos comunidad. Awor cu e acuerdo di cooperacion aki esaki ta bay mehora aun mas. Pa locual ta nos seguro medico general (AZV), esaki Aruba mester ta orguyoso di dje mirando cu nos ta un di e poco paisnan na mundo cu tin un seguro asina extensivo. Hopi paisnan grandi y avansa no tin un seguro general manera esun di AZV, e mandatario ta remarka.
Minister Oduber a papia tambe riba e retonan cu tin den Salud Publico, Aruba no tin e comunidad di mas saludabel. Tin hopi asegurado cu ta sufri di malesanan cronico. Nos tin “dubbele vergrijzing” y tambe ta existi e presion cu Hulanda a impone pa corta presupuesto di AZV cu ta den e Landspakket.
Minister Oduber a splica cu na januari di 2021 a duna e tarea pa haci un investigacion riba eficiencia, efectividad y financiamento di cuido na Aruba na professor Hubben y professor Batenburg. Na januari di 2021 a institui tambe un comision nacional di cuido cu a haya como tarea pa trece diferente recomendacionnan dilanti di con nan ta pensa cu nos por yega na e recorte di 60 miyon florin den cuido. A crea un Roadmap con y unda ta bay haci e reformanan necesario pa garantiza cu AZV ta keda sostenibel.
Den lineanan grandi e MOU aki lo bay percura pa un mihor cooperacion den ambos instituto, un mihor cooperacion entre e personal esta e specialistanan cu ta traha den ambos instituto. Tambe pa brinda un mihor cooperacion na e pashentnan cu ta sufri di malesanan manera diabetes y dialyse. Pa traha mas conhunto den compra di remedinan, sistemanan y ekiponan. Tambe un mihor cooperacion den e sistema di IT.
Minister Oduber ta di opinion cu esaki ta un bon base pa cuminsa traha mas estrecho cu otro y e mandatario tin pleno confiansa den e profesionalismo y e experticio cu ambos instituto ta brinda. Tambe minister Oduber ta convenci cu e cooperacion aki lo mehora e efectividad y eficiencia den cuido medico y naturalmente e calidad di servicio cu ambos instituto ta brinda.
Finalmente e mandatario a gradici Sr. Vroegop di HOH y Sr. Rajnherc di ImSan y tambe na Sr. Jacobs di AZV cu durante e ultimo lunanan a traha duro riba e MOU pa asina por a firma locual ta e producto final cu e meta pa mehora e calidad di cuido y servicio.