Solito: Diabierna den careda di 8’or di anochi a drenta un informe cu lo a scucha tiro cerca di veld di RCA. Mesora a manda polis na e sitio.
Na yegada nan a bin compronde cu no ta trata di un tiramento, pero di un bringamento entre e hobennan deportista. Diabierna tabata tin un wega di futbol entre RCA y RCS di Savaneta, e dos teamnan di U17, cu ta teamnan di muchanan hoben. Nan lo ta hungando pa campeonato hubenil. E hobennan a cuminsa bringa y un a agredi otro.
Varios unidad di polis a presenta na e sitio y pafo nan a bin topa cu un grupo di hungado hoben. Polis a acerca nan y a cuminsa papia cu nan, entre nan tabata tin un hoben cu a bira basta emocional, e tabata bisa polis cu e no kier papia y cu e kier bay cas cerca su mama. Na dado momento e mucha a cuminsa yora. E lo tabata tin un kap of rasca, polis a puntr’e si e kier asistencia di paramediconan di ambulance, na prome instante e la nenga y tabata keda bisa cu e kier bay cas.
Na mesun momento cu polis a yega na RCA un señora lo a cay, polisnan na e sitio a pidi pa presencia di un ambulance pa trata e señora. Na yegada e paramediconan di ambulance a trata e señora na e sitio y despues toch a logra haci un control medico cu e hoben.
Despues cu e situacion a calma e patruyanan di polis a bandona e sitio.
