E defensa di tur sospechosonan lo haya e oportunidad di presenta nan defensa dilanti mesa berde.
Dialuna otro siman, december 12 te cu diaranson 14 e caso Avestruz lo continua su proceso dilanti mesa berde. Den e ocasion aki e abogadonan defensor di e sospechosonan lo tin e oportunidad pa presenta nan defensa dilanti hues. Manera nos tur sa, e caso Avestruz a cuminsa na September y awor a yega su culminacion na December. Esaki ta e ultimo fase di e caso mas grandi di corupcion den historia di pais Aruba. Benny Sevinger tin 5 acusacion serio contra di dje: 1) Falsificacion, 2) Estafa, 3) Labamento di Placa, 4) Abuso di funcion, 5) Soborno. Un caso sigui di cerca pa comunidad y cu a crea hopi conmocion den pueblo. Fiscal den su requisitoir ta declara cu e grupo chikito den Benny su circulo di amigonan a bira “stinkend rijk.” Nan a bira stinkend rijk riba custia di pueblo y riba custiya di e patrimonio di pueblo. Ta mas cu claro cu hopi hende ta hostina pa e accionan di e ex-minister Sevinger.
Mientras Benny ta scondi den accion y no por wake niun caminda, su lider Mike Eman ta muisstil riba e caso. Bao di e mascarada di un protesta ficticio, e coalicion di AVP lidera pa Mike Eman, a core sali for di sala di Parlamento y no kier a trata e presupuesto 2023 di Aruba, pa asina evita enfrenta coleganan riba e realidad di Benny y e caso Avestruz. Te ne dia djawe niun colega di su fraccion a tribi di vocifera algo riba e caso aki. Pa simannan awor no a mira ni tende algo di e protagonista di caso Avestruz. Ta bay ta interesante pa mira kico lo bai sucede na January of februari 2023 y cual lo ta e sentencia di hues den e caso notorio aki.
E postura di Benny ta interesante, despues cu el a para cu basta arogancia den Parlamento, gritando barbaridadnan manera; “E gobierno aki su dianan ta conta, esey ta bo dianan tambe sr. Presidente!” Ademas den otro ocasion Benny a sinta gaba y grita cu niun hende lo kite for den Parlamento, y con e la manda coleganan den coalicion bay “chupe.” Sinembargo, riba e ultimo dia cu fiscal a presenta e requisitoir di sesenta pagina contra Benny, y diripientemente ta parce cu tur su scamanan a baha, y a hasta yora dilanti hues.
Aunke Benny a yora, despues el a lanta cabes atrobe y tanto su persona y miembronan di fraccion di AVP a keda benta PG, landsrecherche, KPA, Hues y tur profesionalnan bao bus. Nan meta ta pa asesina nan caracter den un forma sistematico. Usando palabranan contra nan manera racista, narcista, politicamente motiva, parcial, y hopi palabranan completamente inapropia. Un cos ta sigur, mucho mas nos no lo mester warda pa un decision di hues. E dianan ta cortico, falta poco menos di dos luna pa un sentencia cay. Sigur, tin un presion grandi den seno di AVP. Otro sla pa e “bon comun” ta na caminda? Si Benny ta wordo haya culpabel pa hues, e apoyo pa criminalidad ta e “bon comun” cu Mike Eman kier siña nos hobenan? Cana sali di Parlamento bao argumentonan falso ta parti di e “bon comun?” Sin duda Mike, tur hende a ripara caba cu bo “bon comun” a muri un “mal morto comun!”