Un biaha mas trafico insigur di Aruba ta cobra bida di un persona, Adan Urdaneta Contreras di 42 aña ta e di 13 morto den trafico pa aña 2022 na Aruba
Kudawecha: Diabierna den careda di 8’or di mainta a sosode un accidente hopi cruel, un poco mas pabou di e veld di Kudawecha. Dos pickup flatbed di marca KIA a dal frontal contra otro. Mesora a pidi pa presencia di polis y ambulance cu hopi urgencia na e sitio.
Un morto y un seriamente herida
Na yegada polis nan a bin topa cu un accidente hopi serio cu personanan herida y un cu no tabata duna señal di bida mas. E chauffeur di e flatbed mas chikito no tabata duna señal di bida y den e otro flatbed cu tabata un poco mas grandi, tabata tin un persona seriamente herida. Mesora a pidi pa presencia di ambulance, di autoridadnan competente y tambe di brandweer pa motibo cu e persona cu no tabata duna señal di bida tabata mal pega den e flatbed.
Dos ambulance a presenta na e sitio y cu urgencia a transporta e otro victima pa hospital. E persona seriamente herida tabata den e flatbed mas grandi.
Caminda cera
E caminda pabou di veld di Kudawecha pa bay Sabana Liber a wordo cera mesora trafico y a keda pa basta rato cera. Departamento tecnico a presenta na e sitio pa asina haci e investigacionnan necesario. Slachtofferhulp tambe a presenta na e sitio pa asisti e coleganan y familiarnan di e victimanan.
Na caminda pa trabou
Na e sitio nos a compronde cu victimanan ambos tabata bayendo trabou. Tambe na e sitio nos a combersa cu un colega di e defunto, e la conta nos cu e tabata wardando riba Adan pa bin busk’e pasobra nan a cumpra algun plywood y net diabierna mainta nan a keda di bay buscanan pa bay haci un trabou di construccion cu nan tabata tin pendiente.
Recibo den man
E cabayero a keda cu e recibo den su man y den un tristeza grandi, pasobra algun meter di su cas, su colega Adan tabata envolvi den e accidente y a fayece mesora. Un accidente horibel,cu hamas e cabayero aki lo por lubida. Adan a nace dia 7 di december 1980 na Venezuela. Segun su colega Adan Urdaneta Contreras di Maracaibo.
ARUBANATIVE.COM KIER A EXTENDE SU PALABRANAN DI MAS PROFUNDO CONDOLENCIA NA FAMIA Y AMIGONAN DI E DEFUNTO.
