Den preparacion pa competencia grandi di bowling na juni 2023.
ORANJESTAD: Recientemente den un esfera ameno Minister Endy Croes a ricibi bishita di sr. William “Bill” Edington di Kansas City, Merca. Tambe presente durante e reunion tabata sr. Brian Horn, coach di ekipo di Merca den e disciplina di bowling alabes ex hungado profesional bowling y sra. Izaira Mansur. Mester agrega cu Sr. Edington ta representa USA Athletes International alabes amigo pa hopi aña di nos Madatario di Deporte. Sr. Edington ta trece diferente deporte e.o. basketball, softball, futbol, bowling etc y hungadonan na diferente parti di mundo e.o Aruba. Sr. Edington a informa Minister Endy Croes cu nan tin planea pa organisa un competencia grandi di bowling na Aruba den luna di juni 2023 hunto cu e coach di ekipo di Merca sr. Horn. Nan a mira e facilidad di Eagle Bowling den preparacion pa e torneo unda cu ta trece un ekipo grandi di Merca pa competi na Aruba. Durante e reunion a intercambia idea. Sr. Edington a reuni tambe cu Aruba Bowling Association (ARBAS) cu ta e federacion di bowling di Aruba. Actualmente sr. Edington y su ekipo ta den e proceso pa finalisa e plan prome cu fin di aña cual lo wordo publica. Minister Endy Croes ta desea nan hopi exito cu e prepacacion y organisacion pa e campeonato di bowling.