E luznan di speranza pa un mihor Aruba pa un y tur a keda ilumina den un gran ambiente na Cas di Partido. Dirigencia di Partido ta manda un caluroso abrazo pa tur cu a traha duro y ta sostene e esfuerso pa trece cambio y felicidad bek pa nos pueblo. Cu hopi stimacion for di nos curason.
Partido AVP a nace for di un cuna di un deseo ferviente di Pueblo di Aruba pa bienestar general. Na e occasion aki, e lider di Partido, mr. Mike Eman a expresa cu un nacimento asina, for di alma di comunidad ta crea un compromiso profundo y special cu destino y mission di cada prohimo riba nos dushi isla cu ta pasa di un generacion pa otro.
Nace den un cuna di sentimiento comun a bai na caracterisa AVP den curso di historia. Cada generacion nobo di integrantenan di e partido ta realisa cu nan tin un yamada pa contempla riba e nececidad y aspiracionnan cu ta biba den comunidad y traduci esaki den un perspectiva nobo pa futuro, un Plan di Pais basa riba e Bon Comun. Cada un den su tempo, enfrente di su realidadnan a accepta e reto, mission y destino aki. Awor ta momentonan asina. Pueblo ta anhelando un cambio y ta den un nececidad urgente pa recobra su felicidad.
Eman ta expresa cu awe na pia di un cero cu retonan grandi pa nos Pais nos tey hunto cu Boso pa lora manga un vez mas y traha duro pa saca nos comunidad for di depression, pobresa y recession y eleve bek cu optimismo y speranza nobo na un rumbo di felicidad y prosperidad comparti, cu un atencion special pa esnan mas vulnerable den nos comunidad: Nos grandinan, nos muchanan, esnan den soledad y nos enfermonan.
Laga nos drenta anja nobo carga cu e sentimientonan aki pa nos Pais, pa nos Pueblo, nos sernan keri y humanidad y cu guia y Bendicion di nos Creador y nos lo encontra otro atrobe riba e rumbo di un causa comun nobo. Hunto nos lo braza e apelacion cu ta sali for di un plan coherente y un equipo prepara cu por motiva nos imaginacion y determinacion pa pone nos Pueblo y Pais atrobe riba un rumbo di felicidad.
Den e ambiente aki di speranza pa un mihor mayan combina cu e compromiso pa trece cambio y realisa e Bon Comun pa pueblo e luznan berde di speranza a keda cendi na Cas di Partido.
