‘MAKING MARKETS WORK FOR CONSUMERS AND BUSINESSES’
ORANJESTAD – AFTA a organisa un congreso ‘MAKING MARKETS WORK FOR CONSUMERS AND BUSINESSES’ dia 1 di december 2022 cu a tuma luga na Hilton Aruba Caribbean Resort & Casino. E congreso aki a tabata bon bishita y un total 45 persona a participa.
Tabata tin oradornan local y internacional:
- Sr. Albert Scholten (manager di implementacion di AFTA)
- Sr. mr. dr. Christof Swaak (abogado na oficina di abogacia Stibbe New York); y
- Sra. drs. Jeanne Fabian (directora interino di Fair Trade Authority Curaçao)
Durante e congreso aki Sr. Scholten a duna un splicacion cortico di e Ley di Competencia di Aruba (Mededingingsverordening) y a menciona e reglanan di e Ley aki cu lo drenta na vigor despues di e fase di implementacion. Sr. Swaak a para keto riba e oportunidadnan cu e Ley nobo lo crea pa companianan cu ta activo riba e mercado di Aruba. Por ultimo, Sra. Fabian a comparti un tiki di e experiencia na Curaçao pa cu e introduccion di e Ley di Competentia di Curaçao y ki impacto esaki tabata tin pa comercio y consumidornan.
Despues di e presentacion e oradornan a contesta preguntanan specifico di e publico. Esaki a conduci na discusionnan hopi interesante y fructifero.
Un danki na tur e participantenan y un danki special na e oradornan cu a comparti nan experticio cu tur esnan presente.
Mirando e interes halto den e topico aki AFTA lo organisa mas evento informativo pa nan stakeholders. AFTA ta invita tur stakeholders cu ta interesa den un sesion informativo pa tuma contacto cu nan via [email protected].
Pa esnan cu no por a presencia e evento aki por wak e grabacion riba e pagina di Facebook di AFTA. Sigui nan riba nan pagina di Facebook ‘Aruba Fair Trade Authority’ pa haya mas informacion tocante e Ley di Competancia, futuro eventonan y campañanan di conscientisacion.