Oranjestad, Aruba – Riba 1 di december 2022, ELMAR promoviendo energia sostenibel ta lansa e proyecto piloto “EV ChargeUp”. E obhetivo di e proyecto aki ta pa ELMAR sigui desaroya un infrastructura mas accesibel, instalando mas “Charging Stations”, brindando e servicio pa recarga vehiculonan electrico (EV) rond Aruba.
E proyecto ta parti di e vision y maneho di ELMAR promoviendo innovacion y sostenibilidad, segun e Plan Nacional di Energia di Gobierno di Aruba.
Tur propietario di vehiculo electrico “EV owners” ta wordo invita pa participa den e proyecto piloto aki y haci uzo di Charging Stations di ELMAR rond Aruba. ELMAR como distribuidor di coriente na Aruba kier stimula uzo y sigura funcionamento optimal di e tecnologia innovativo aki.
Actualmente tin EV ChargeUp Stations na:
• SETAR Palm Beach,
• MFA Noord,
• Local Store,
• ELMAR Oranjestad, HATO y San Nicolas,
• Aeropuerto Reina Beatrix,
• Pazuid di Rotonde di Pos Chiquito.
ELMAR lo sigui instala mas Charging Stations den aña 2023 na varios otro area rond Aruba promoviendo asina uzo di vehiculo electrico den nos comunidad door di inverti den e infrastructura necesario.
Bo ta un “EV owner”? Bo ta interesa pa participa den nos proyecto piloto? Bishita www.elmar.aw/EV y sigui e instruccion pa download e App, crea bo “EV ChargeUp account” y registra na nos proyecto piloto. Pa mas informacion riba nos proyecto piloto por yama nos Call Center di dialuna pa diabierna entre 7:30 am pa 4:30 pm na 523-7100. Entrante, 7 december 2022 tur participante por bishita un sucursal di ELMAR pa firma participacion na nos proyecto piloto y activa bo EV ChargeUp account.
ELMAR ta invita tur propietario di vehiculo electrico interesa pa participa den e proyecto innovativo aki pa haci uzo di e oportunidad aki pa recarga vehiculo electrico rond di Aruba.