Oranjestad, November 29, 2022 – Utilities ta lamenta e actitud y pasonan cu e directiva di VWI ta tumando pa sistematicamente trece confucion den comunidad cual no ta na interes di WEB y ni di Aruba tampoco. Na mas cu un ocacion ya a splica e asociacion kiko ta e responsabilidad di Utilities y e maneho cu ta wordo hiba segun e Plan Nacional di Energia. Sinembargo nan ta escogiendo pa haci cu nan no ta compronde. Di un manera of otro nan ta tratando di sembra confucion den comunidad cu un meta cu ainda Utilities no ta compronde.
Pero pa evita cu VWI ta sigui purba manipula opinion publico, nos ta aclarea pa comunidad e siguiente ponencianan cu nan a trece padilanti.
Violacion di CGC – Utilities ningun momento a viola regla ni codico di e Corporate Governance Code cu tin acorda entre e companianan. Gobierno di Aruba ta doño di tur accion di Utilities y Utilities ta doño di tur accion di e companianan Elmar y WEB. Esaki ta significa cu Utilities ta e instancia yama pa lidera e vision y ehecucion di Plan Nacional di Energia y no VWI ni WEB ni ELMAR. Utilities ta eherce e responsabilidad aki den consulta cu gerencia di ambos compania estatal y te awor aki esaki a bay masha bon.
Destaho Publico – Ningun momento un destaho publico a tuma lugar pa un di dos Parke di Molina pa Aruba. Loke a tuma lugar ta un peticion inicial pa explora e interes cu por tin na nivel internacional, di parti di companianan specialisa den generacion di energia di biento pa Aruba. E proceso aki yama Request for Expression of Interest (EOI) na papiamento; Peticion pa Exprecion di Interes. E proceso aki a tuma lugar den un forma
transparente cu supervision di Notario, pa asina Utilities y comunidad di Aruba por haya un bista cla di e disponibilidad cu tin riba mercado pa inverti den un di dos Parke di Molina pa Aruba. E resultado tabata exitoso cu un total di 28 compania kendenan a manifesta nan interes. Awor un comision special cu ta consisti di representantenan di e companianan estatal y huristanan ta bay evalua esnan cu a inscribi.
Statutonan – Ningun momento Statutonan ta prohibi Utilities Aruba N.V. pa organisa un peticion pa un EOI. Utilities tin un responsabilidad pa carga y den margen di e reglanan di CGC – Codigonan di Gobernacion Corporativo, a ehecuta su responsabilidad, publico na un manera transparente.
Ta importante pa remarka cu ta Utilities ta e instancia responsabel pa ehecuta e Plan Nacional di Energia di Gobierno y no e companianan estatal di utilidad directamente. E Crisis di Clima mundial a pone cu paisnan a bini hunto, incluyendo Aruba, Hulanda y Reino completo, pa acorda un agenda cu metanan ancra den tratadonan internacional cu tin cu wordo logra y segun terminonan acorda. A base di e prioridadnan aki y otro prioridadnan critico cu a surgi despues di e Pandemia, Guera y awo e crisis di Inflacion, ta ehecutando e Plan Nacional di Energia di Gobierno.
Utilities no tin culpa cu durante e periodo promer cu e director actual, nada a wordo haci pa cu un Plan di Energia. Mas bien tabata tin varios aña di stagnacion y proyectonan cu no a resulta. Awor si tin un bon Plan riba mesa y cu cooperacion di Elmar y WEB e por wordo ehecuta na bienestar di henter nos comunidad. Paisnan rond mundo ta poniendo tur atencion necesario pa modernisa nan maneho di energia y di nan Grid, pa e ta mas limpi, dinamico, eficiente, stabiel y sostenibel.
Utilities ta spera cu e informacionnan suministra den e comunicado aki por a brinda e aclaracion necesario pa nos comunidad. Utilities ta comprometi pa un maneho integro di Energia, pa nos pais por wordo sirbi cu energia na bon prijs, sostenibel y cu stabilidad. Nos ta habri pa cualkier pregunta of investigacion di cualkier instancia.
Gerencia Utilities Aruba N.V.