Djasabra último Wardakosta a risibí un notifikashon di Wardakosta di Venezuela, ku un boto tabatin problema ku su motor. E boto tabata drif riba laman den e area di responsabilidat di Wardakosta Karibe Hulandes i e tres okupantenan di e boto tabatin nesesidat di yudansa agudo.
Sentro di Operashon Marítimo di Wardakosta despues di e notifikashon, a pidi asistensha di e avion Dash. Una bes ku e avion a yega na e lokalidat e tripulashon di e avion patruyero a nota e boto den nesesidat. E avion patruyero a bula den besindario di e boto en buska di un barku òf boto ku lo por duna yudansa na e okupantenan di e boto den nesesidat. Den besindario e avion Dash a nota un barku de bela ku kuater mast, ku e nòmber Star Clipper i a pidi esaki pa duna asistensha na e boto ku tabata drif ku su okupantenan riba dje. E barku di bela Star Clipper a tuma e okupantenan den nesesidat na bordo i a hiba esakinan Colombia, kaminda outoridatnan aya a tuma kargo di nan.