201
Aruba ta perde otro gran persona, cantante, bolerista y artista den nos mundo musical.
Esaki ta den e gran Persona, Artista , Musico, Cantante, Bolerista, Sr. Hector Mario Quilotte, miho conoci como Tico.
Tico a lanta den e bario di Rancho y ta bini di un famia di shete ruman, di cual Tico ta e di cinco ruman. E semper a comparti su trabou cu musica y tabata traha na Directie Posterijen. Durante cu Tico tabata traha e tabata haci su musica den oranan di anochi na Hotel. E tabata un persona cu no ta para keto. Semper e ta gusta canta y ora e ta core su auto e ta train su cancionnan cu e tin cu presenta na hotel den oranan di anochi.
E bida artistico di Tico a cuminsa ora e tabatin diescuatro aña di edad, y frecuentemente Tico tabata bay e show di Edison Croes cu tabata tin un programa ‘Buscando Talento Artistico’ na e Radio Voz di Aruba. Tico tabata gusta canta, pero tabata tin un poco miedo di e microfon, door di esey nunca e la canta den e programa di Edison Croes. Su instrumentonan cu e por a maneha tabata maraca y tambe raspa. Tico tabata canta den Koor y a haya ayudo di e sra. Rhoda Frigerio (d.f.m.) y tambe di sr. Rufo Odor (d.f.m.).
Tico a cuminsa su trayectorio musical y a cuminsa gana experiencia y por a canta tur cos. E la cuminsa den ‘De Trupialen’, despues cu ‘Los Elegantes’, ya pa den aña ’55, Tico por a canta tur cos despues di a compaña varios artista nan di Hooligans Mexico, Tico a switch pa musica Latino.
Tico su participacion den gruponan musical, a cuminsa cu ‘Los Elegantes’ y ‘The Hap Cats’ y despues cu ‘Oruba Sextet’ bou direccion di Joy Kock. Mas despues Tico a cambia y a bay cu ‘The Latin Power’. Tico a canta cu e Orkesta di Mario Bislik (d.f.m.). Tico a canta cu ‘The Golden Notes’ na Sheraton Hotel bou direccion di Joy Kock. Den ultimo aña Tico a forma parti di e agrupacion musical di sr. Cay Luidens, pa motibo di salud Tico mester a termina cu esaki. Pero si, el a keda canta su boleronan ora cu e haya un invitacion. Semper e gruponan cu Tico a participa, nan a mara nan mes cu contractnan y a siña gana hopi disciplina pa cumpli cu nan contractnan.
Cu e grupo ‘The Latin Power’ Tico a bay graba na Colombia y tambe Tico a realisa su soño grabando ocho pieza di Bolero riba su CD aregla pa Johnny Scharbaay.
Cu agrupacionan musical cu Tico a participa aden, a presenta Aruba na Corsou, Venezuela Colombia, y Suriname. Na Aruba Tico a canta den Festival di Tumba, Festival di Voz di Oro y tambe Tico a yega di gana Festival di Posterijen.
Nos ta gradici Sr. Hector Mario Quilotte, miho conoci como Tico y sigur hopi danki pa su contribucion y disciplina na Aruba cu su canto, musica y musica popular di cual lo keda graba como ehempel den e historia di musica na Aruba.
Farandula di Musica na Aruba ta di luto un biaha mas cu su perdida.
Nos ta manda un palabra di condolencia pa su pareha Shirley, na famia di Tico, tambe na tur musico, su ex empleadonan di Directie Posterijen y tur su amigo y conocinan, y esnan cu a conoce y stim’e den su trayetorio como artista, musico, cantante y bolerista den su area musical.
Cu Hector Mario ‘Tico’ Quilotte ricibi su luga mereci den Reino di Señor.