ORANJESTAD: Diabierna atardi Minister Endy Croes a reuni cu directiva di Fundacion Facilidadnan Deportivo (FFD). Den e encuentro Mandatario di Deporte a informa e directiva oficialmente cu Gobierno di Aruba ta bay cuminsa cu renobacion di e stadion na Dakota, cu ta cay bou di Land Aruba. E renobacion ta planea pa cuminsa fin di januari 2023. E reunion tabata uno informativo pa asina FFD cuminsa informa cu desde comienso di luna di februari 2023 no por tin ningun actividad deportivo den stadion na Dakota, ya cu lo wordo cera pa aproximadamente 10 luna. Esaki ta conta tambe pa CEMEDAR cu doctornan deportivo cu ta huur e oficina den e stadion. Tambe a trata e vision di Gobierno pa tin plan di mantencion pa tur e otro facilidadnan cu FFD ta maneha. FFD a indica cu nan ta den pleno preparacion pa finalisa e rapport final cu tur e costonan cu lo keda presente na Mandatario di Deporte den e lunanan nos dilanto. FFD a duna tambe informacion di nan operacion. Minister Endy Croes ta sigui traha cu amor pa deporte en general na Aruba.
