“Meta principal ta e caso di Aruba, con nos ta recuperando y nos ta presenta esaki cu cifra y cu estadistica. Nos lo presenta e caso real di Aruba”
Otro siman, hunto cu Minister di Finansas, Xiomara Maduro, Prome Minister Evelyn Wever-Croes lo ta na Hulanda pa atende reunionnan riba e tema di recuperacion di Aruba. Den e reunionnan aki e mandatarionan lo comparti con Aruba ta recuperando despues di e crisis di Covid. Aruba tabata un di e paisnan mas fuertemente afecta. Esaki IMF mes a publica riba dje pero Aruba ta un di e paisnan cu mas lihe ta recuperando den nos region.
META DI E REUNIONNAN:
Prome Minister a duna di conoce cu e meta di e reunionnan aki ta pa presenta e plan di recuperacion di Aruba y mira unda Hulanda por yuda nos pa esaki bay mas lihe. “Si nos mira con 2023 ta proyecta di ta, bo ta mira cu e asuntonan di mas grandi cu tabata causa discusion entre Hulanda cu Aruba, a wordo atendi cu ne”, Prome Minister a enfatisa.
3 PALABRACION CU GABINETE WEVER-CROES:
Prome Minister a elabora riba e 3 palabracionnan cu Gabinete Wever-Croes a haci cu Hulanda na 2018, ora cu a drenta Gobierno. E prome ta cu lo yega na un surplus cual Gobierno a logra na 2019. “Lastimamente na 2020, apesar cu e tabata mustra prometedor, nos no a logra concretise debi na e pandemia. Pero den apenas 3 aña na 2023, nos ta logra y ta bek riba e trayecto di finansas publico sostenibel cu nos tabata prome cu e pandemia”.
E di dos palabracion haci na 2018 ta e gastonan di personal cu tambe ta sigui baha. “Esaki tambe ta resolve contal nos mantene e nivel ey”.
E di tres palabracion ta esun cu nos no por cumpli cu ne ainda y esey ta e quota di e debe (GDP). Gobierno a palabra na 2018 cu na 2037 nos tin cu yega 50% di nos GDP. Cu e debe gigantesco di Covid, e 916 miyon cu Aruba a presta di Hulanda durante pandemia, Gobierno no por yega e meta aki mas. “P’esey nos ta bay Hulanda y presenta alternativanan y mira con Hulanda por yuda nos cu esaki”.
REUNIONNAN NA HULANDA:
Tambe e mandatarionan lo tin reunionnan cu entre otro Premier Rutte, cu Minister di Finansas, cu Minister di Klimaat. Tambe lo tin presentacionnan den Eerste Kamer, Tweede Kamer, e parlamentonan. E mandatarionan di Aruba lo ta na Raad van State cu ta e organo constitucional mas halto ayanan tambe y lo reuni cu diferente otro instancia riba e tema financiero, calculacion y estadistica. Lo reuni tambe cu e alcalde di Den Haag riba cooperacionnan entre e municipionan y Aruba. Lo reuni cu Centraal Plan Bureau pa yuda cu e calculonan cu mester.
Den tur su biahenan, Prome Minister a bishita Rekenkameer y lo haci esaki atrobe y lo atende tambe e temanan di relacionnan exterior cu ta un tema cu ta cay bou su ministerio, defensa y siguridad nacional.
Riba invitacion di Premier Rutte, Prome Minister lo atende tambe un reunion na Catshuis cu ta trata riba e historia di sclavitud. Tur indicacion ta mustra cu esaki ta un tema hopi importante pa Hulanda. Talves aki na Aruba e ta un poco menos importante pero no ta kita afo cu Aruba lo por duna su aporte. E cooperacion di Aruba ta cu nos ta contento di a wordo envolvi den e discusionnan aki. Tin mas pais rond mundo ta ofreciendo disculpa pa cu e historia di sclavitud. Aki na Aruba Minister Xiomara Maduro ta encarga cu ne y un comision cu el a institui.
“Esakinan ta e puntonan principal pero lo tin mas topico. Indudabelmente unabes nos ta na Hulanda nos lo haya mas invitacion cu nos lo encarga cu nan. Meta principal ta e caso di Aruba, con nos ta recuperando y nos ta presenta esaki cu cifra y cu estadistica. Nos lo presenta e caso real di Aruba.
Oposicion a purba di daña e imagen di Aruba y nos lo percura pa elimina e daño aki y presenta e caso real. Si Hulanda kier yuda nos, nan lo indica con nan lo por yuda pa asina nos recupera mas lihe y trece progreso y bienestar na nos ciudadanonan”, Prome Minister a duna di conoce.