Home Politics Minister Rocco Tjon: NCTVI CU RESULTADONAN SUBLIME DESPUES DI UN “QUALITY...

Minister Rocco Tjon: NCTVI CU RESULTADONAN SUBLIME DESPUES DI UN “QUALITY STANDARD VISIT” FOR DI INTERPOL

SHARE

ORANJESTAD – Na maart ultimo, a conduci un “quality standard visit” for di e secretariado di Interpol, pa asina evalua nos “National Central Bureau for Counter-Terrorism, Security and Interpol” (NCTVI). For di e evaluacion aki, a sali afo cu NCTVI Aruba ta un di e miho organisacionnan di “National Central Bureau” den e region Caribense. Un organisacion cu ta centralisa riba metodonan inovativo, cu ta haci bon uzo di e hermentnan di Interpol, ta traha a traves di cooperacionnan cu otro departamentonan hudicial pa mantene nos fronteranan sigur y ta conta cu e sosten di Ministerio di Husticia y Asuntonan Social.

Segun e rapport ta indica, NCTVI ta un organisacion sublime, sinembargo manera ta cu cualkier otro organisacion, semper tin espacio pa mehoracion. Den caso di NCTVI, e saca algun recomendacion a base di e evaluacion pa asina optimalisa nan funcionalidad. Asina por menciona por ehempel, cu por expande e uzo di e database di Interpol cu demas departamentonan hudicial, manera, Inmigracion Aruba pa asina optimalisa e funcionalidad, dentro di e contextonan permiti. Banda di esaki tambe ta recomenda pa inclui demas departamentonan hudicial manera Cuerpo Policial na trainingnan y e-learning brinda pa Interpol. Asina tin algun recomendacionnan mas cu a sali afo for di e evaluacion aki, pa asina eleva e calidad di NCTVI Aruba.

Ministerio di Husticia y Asuntonan Social ta manda palabranan di pabien na henter e ekipo di NCTVI Aruba, cu a demostra di ta mas cu capacita pa eherce nan trabou na un manera profesional y al caso.