ORANJESTAD – Diahuebs, Parlamento di Aruba a aproba e presupuesto 2022 di e Tourism Product Enhancement Fund (TPEF), caminda Minister Dangui Oduber a trece puntonan cardinal dilanti cu ta importante pa fortalece nos unico pilar economico. E Minister a gradici Parlamento pa aproba esaki, marcando un paso importante pa e desaroyo turistico di Aruba.
TPEF ta un fondo cu a wordo estableci na 2010 pa eleva e producto Aruba. Cu e aprobacion aki, Minister Oduber su vision y maneho pa sigui mehora producto Aruba, sigui eleva e calidad di Aruba como destinacion, sigui mehora e servicio cu nos ta duna y sigui eleva e nivel di nos turismo ta continua. Pues den cuadro di e vision pa engrandece nos turismo a base di un maneho profesional y transparente, lo sigui lucha pa mantene y eleva e nivel di experiencia cu e turista ta bin busca den e producto Aruba.
Diahuebs Parlamento di Aruba a aproba e presupuesto di TPEF aña 2022 na e suma di 3.3 miyon florin. Di e fondo aki 1.6 miyon florin lo bay na inversionnan haci pa mehora producto Aruba pa asina ofrece un mihor experencia na nos bishitantenan. Den e inversionnan aki tin proyectonan manera Malmok Boardwalk Fase 3, embeyecimento di e trapi na Hooiberg cu mosaic (fase 2), proyecto di embeyecimento di e Eagle Beach strip y tambe e mantencion di esakinan.
Na banda di e inversionnan cu lo wordo haci pa medio di TPEF, e fondo lo ta aportando na otro aspectonan di e area, trahando cu diferente stakeholder. E aspectonan ta encera preservacion di e medio ambiente y herencia cultural. Programanan di conscientisacion, manera entre otro ‘Stima mi, Sterilisa mi’ ta hayando nan debido sosten. Tambe lo ta trahando riba embeyecemento di areanan turistico, door di percura pa e mantencion debido di e infrastructura y paisahe.
Minister Dangui Oduber tin e pleno confiansa cu e fondo di TPEF lo sirbi pa engrandece nos producto Aruba y ta ‘sumamente satisfecho cu e logro importante aki’.