Siman di conscientisacion tocante Antibiotica na Hospital
E siman aki ta celebra World Antimicrobial Awareness Week, esta un siman unda mundialmente ta pone enfasis riba e uzo corecto di antibiotica. Esaki ta encera e indicacion corecto, den e dosis corecto y e duracion corecto pa asina nos frena e microorganismo resistente pa antibiotica (superbug).
Di 18 pa dia 24 di november nos ta para keto un rato riba esaki y e aña aki e team, esta HOH su A-Team (Antibiotics Team) tras di esaki ta pone extra atencion riba alergia pa antibiotica.
“Resistencia pa antibiotica ta un problema mundialmente conoci na hospitalnan. Durante e siman aki na HOH ta enfoca riba alergia pa e grupo di antibiotica penicilline pero tambe en general. Profesionalnan den cuido medico hopi biaha ta encontra pashentnan cu ta informa of registra cu nan tin un alergia pa antibiotica. Mayoria di biaha pa e grupo di penicilline. Esaki por tin consecuencia cu e pashent ta haya antibiotica di ‘second choice’ cual cu por ta menos efectivo pa trata e infeccion of tin mas efecto secundario.
Ademas, investigacion internacional a deduci cu si un persona a yega di ta alergico pa cierto antibiotica esaki por resolve su mes despues di tempo. Ta importante pa tin tur informacion tocante e pashent su historia di remedi y cualkier alergia asina Internista Jaclyn de Kort ta splica.
Jacomien Aleman, Boticario na HOH ta conta cu “dunado di cuido lo combersa cu e pashent tocante su alergia di antibiotica. E dunado di cuido por ta un dokter, un nurse of empleado di botica na Hospital. Ta puntra informacion tocante e alergia, cuanto tempo pasa tabatin e alergia y tambe con severo e ta. Despues por registra esaki den e sistema electronico di prescribi medicamento na hospital. Si despues un otro persona ta prescribi e remedi aki e lo haya un aviso estilo ‘pop-up’ cu ta adverti contra y hasta si ta un alergia severo e lo wordo blokia. Consecuentemente, e remedi no por wordo prescribi mas pe pashent.
Pa Hospital pues, ta importante pa tin un bon registracion pa asina evita uzo innecesario di antibiotica cu por tin consecuencianan pe pashent manera efectonan secundario y admision mas largo den hospital ademas cu banda di esaki ta crea resistencia pa antibiotica (antimicrobial resistance). Na final, esaki ta solamente ne beneficio y calidad di cuido pa pashentnan. Ban sea consciente cu nos medicamento!
