Home Politics Prome Minister Evelyn Wever – Croes: SURPLUS DEN PRESUPUESTO 2023 TA...

Prome Minister Evelyn Wever – Croes: SURPLUS DEN PRESUPUESTO 2023 TA SIGNIFICA MAS ESPACIO PA INVERSION

SHARE

‘Loke nos mester haci ta tin fe, sigui traha duro den union, y no kibra otro.’

ORANJESTAD – Recientemente Parlamento di Aruba a aproba presupuesto pa aña 2023 cu un surplus di 1%, ekivalante na 63 miyon florin. Cu e logro aki, Prome Minister Evelyn Wever – Croes a expresa cu Aruba ta riba rumbo pa progreso y di finanza sostenibel bek.

Prome Minister Evelyn Wever – Croes a expresa cu e ta un sentimento special pa por tin presupuesto 2023 aproba cu un surplus di 63 miyon florin. Asina ta pone Aruba bek riba e trayecto di finanzas sostenibel, y cu esey ta bin progreso bek pa pais Aruba.
A pesar cu no a sali for di e efectonan di e pandemia ainda, ta premira cu aña 2023 ta bay ta un aña hopi mas mihor. Prome Minister a sigui splica cu presupuesto cu surplus ta encera cu lo por cuminsa inverti di berdad den areanan cu ta necesario manera den enseñansa, den cuido/salud, den seguridad di nos pais, den infrastructura etc. E forma con Aruba su economia a recupera ta danki na trabou duro di nos hendenan y si sigui traha duro awo, sigur lo por logra mas cos grandi pa Aruba. ‘Ami ta optimista pa e futuro cu ta spera nos. Loke nos mester haci ta, tin fe y sigui traha duro den union, yuda otro y no kibra otro,’ Prome Minister a expresa.

Terminando Premier Wever – Croes a expresa cu ta premira cu e aña nos dilanti lo ta un bon aña pa Aruba y tur ciudadano di nos pais. ‘Nos compromiso ta pa trece progreso y bienestar pa tur y esey ta locual nos ta bay haci tambe.’