ORANJESTAD-Aruba pa di 4 aña consecutivo tabata e pais anfitrion pa e conferencia anual “German-Caribbean Energy Conference” cu a tuma lugar 15 di November 2022. Durante e conferencia aki, Prome Minister Evelyn Wever-Croes tabata tin e oportunidad pa hiba palabra extendiendo asina un cordial bon bini na esnan presente y gradiciendo e organisadonan pa a scoge pais Aruba un biaha mas como anfitrion di e conferencia aki.
Durante su discurso, Prome Minister a splica cu energia renobabel y energia eficas ta topiconan hopi importante pa e islanan den Caribe, incluyendo Aruba. Mundialmente e topiconan aki tambe ta hayando hopi atencion den e contexto di cambio di clima. Pa e “Small Island Development States” (SIDS) rond mundo, cambio di clima ta sumamente importante mirando e daño cu esaki por ocasiona. Specialmente islanan den Caribe cu ta depende di e sector turistico, ta vulnerabel na cambio di clima, ya cu un horcan por caba cu mas cu e “GDP” anual di un pais manera Aruba. Pa e motibo aki, e miho opcion ta pa evita e impacto negativo di cambio di clima por completo.
Prome Minister a indica cu Aruba mescos cu e otro islanan SIDS, a reconoce cu e dependencia riba “fossil fuels” cu ta conoci pa fluctua di prijs constantemente, ta trece incertidumbre den loke ta costo di bida y crecemento economico. Esaki a conduci Aruba na cuminsa cana e caminda pa reduci emision di carbon.
E proceso aki a cuminsa prome cu 2009 na unda Gobierno hunto cu e companianan di utilidad a bin cu un plan strategico cu e obhetivo di reduci e consumo di HFO y emision di carbon. Lastimamente e plan aki no a wordo realisa, pero na momento cu a bin un cambio den mandato di gobierno, stakeholdersnan a aserca Gobierno y urgi pa hunto bin cu un plan mas realistico. Gabinete Wever-Croes tin como prioridad riba agenda pa re-evalua e inversionnan haci te cu awor y reforma e vision energetico pa Aruba.
Pa Aruba ta importante durante e transicion energetico, pa enfoca riba e ser humano y pa ta alinea cu e Metanan di Desaroyo Sostenibel di Nacionnan Uni (SDG’s). Pa e sector energetico esaki tambe ta importante en bista cu energia ta hunga un papel importante pa loke ta trata costo di bida di e ciudadanonan.
“Aruba ta comprometi pa sigui traha contra e efectonan di cambio di clima. Tur cambio ta cuminsa di paden, pero ta solamente si tur isla y nacion para hunto, nos lo por gana e bataya contra cambio di clima”, Prome Minister a expresa.
