ORANJESTAD – Dia 28 di november proximo lo inicia desmantelacion di tanki di awa na Alto Vista. Esaki ta forma parti di WEB Aruba su plan pa construi un tanki nobo cu un capacidad mas grandi y traha di material mas sostenibel. Reemplaso di e tanki di awa ta necesario pa por keda suministra awa di bebe di calidad den area di Noord, awor y den futuro. E trabou di desmantelacion ta tuma lugar durante e periodo di 28 di november pa di dos mitar di januari 2023.
E trabou di desmantelacion lo tuma lugar 6 dia pa siman entre 7:00 AM y 6:00 PM. Durante e periodo di desmantelacion lo por nota trafico di ekipo pisa den e area. Tambe ta existi e posibilidad di disturbio di ruido. Di antemano WEB ta pidi disculpa y ta spera di por conta cu comprension di habitantenan.
En caso di pregunta of cu ta nota algo straño den e area, por tuma contacto cu WEB su Call Center na tel. 280-4600, of por manda un WhatsApp, pa WEB Aruba Chat na 525-4600.
E proyecto di Tanki Alto Vista ta forma parti di WEB su proyecto ‘Upgrade Aruba Water Distribution Network’; un proyecto grandi cu ta encera renobacion di tankinan, pomp y tuberia rond nos isla, pero tambe den planta di WEB.