Home Local AZV ta aclarea: E proceso di cuido medico den exterior

AZV ta aclarea: E proceso di cuido medico den exterior

SHARE

Despues di algun siman cu OE AZV ta observa un gran cantidad di reaccion di diferente persona riba medionan social tocante cuido medico den exterior, OE AZV ta hay’e necesario pa haci uzo di e oportunidad aki pa splica e proceso di cuido medico den exterior via AZV cu e meta pa cada asegurado compronde e proceso.

Conforme Ley AZV e asegurado tin derecho riba cuido medico na Aruba. Esaki ta nifica cu expertonan medico ta esnan encarga cu e tarea pa consulta y evalua cada caso. Por ehempel si un asegurado sinti malo e ta acudi na su dokter di cas. A base di evaluacion y indicacion medico, e dokter di cas ta referi pa un specialista.

Den caso cu pa motibo cu no tin por ehempel e ekipo disponibel, e infrastructua y of e conocemento y tur loke tabata posibel a wordo haci na Aruba, e ora e specialista di e asegurado por haci peticion na AZV pa cuido medico den exterior.

Comision CGZ
AZV ta traha cu un comision independiente di experto medico (CGZ) pa evalua peticion y duna OE AZV conseho. Den gran mayoria di caso, OE AZV ta tuma e conseho over. For di e evaluacion por sali lo siguiente;
A) Asegurado ta haya un rechazo.
B) Asegurado ta wordo pidi pa un 2do opinion (y of mas tests y of otro trayectoria) na Aruba mes.
C) Asegurado ta haya un aprobacion.

Den caso A, esta di un rechazo, e asegurado por entrega un bezwaar. Esaki lo wordo atendi conforme LAR, Landsverordening Administratieve Rechtsspraak. Den caso di B, e asegurado ta haya informacion y splicacion di e motibo pa cual ta scoge pa esaki. Despues di cana e trayecto aki, por sali afo cu e asegurado por wordo yuda na Aruba mes of cu ainda OE AZV mester aproba pa e asegurado bay exterior.
Den e ultimo caso, esta C, unda tin aprobacion, OE AZV lo organisa e biahe pa e hospital den exterior.

Recapitulacion
Recapitulando, e base legal pa cobertura di gasto den exterior ora un asegurado dicidi di bay riba su mes exterior pa cuido medico lamentablemente no ta existi ainda. Ora un asegurado scoge pa biaha

riba su mes pa exterior, tur gasto ta pa su propio cuenta. Gastonan medico por core hopi halto lihe y esaki ta motibo pa cual OE AZV semper a bin ta alerta tocante e topico aki.