Home Politics Miguel Mansur, na Evelyn Wever-Croes: Nos ta scoge pa enfoca riba lo...

Miguel Mansur, na Evelyn Wever-Croes: Nos ta scoge pa enfoca riba lo positivo

SHARE

Durante tratamento di presupuesto supletorio 2022 dos cos increiblemente positivo a sali di boca di nos Prome Minister cu a duna nos fraccion hopi inspiracion pa futuro. Sra. Wever-Croes a vocifera durante reunion cu, “un cos cu ela siña ta keda leu di discriminacion.” Esey ta un punto cu nos ta 100% di acuerdo cu Prome Minister y lo apoya den tur sentido. Nos di Accion 21 no ta kere den ningun tipo di discriminacion y igualdad ta un di e pilarnan di nos partido. Nos ta carga speransa cu Sra. Wever-Croes lo sa di lidera su partido na un Aruba mas inclusivo sin discriminacion ora e ley di matrimonio pa parehanan di mesun sexo yega Parlamento. Nos ta conta riba su ponencia di kier ‘keda leu di discriminacion’ pa inspira su fraccion pa no sconde tras di prehuicio di un minoria ora ta vota riba crea un Aruba mas igual.

Prome Minister Sra. Evelyn Wever-Croes tambe a comparti den Parlamento palabranan di nos Libertador tocante kende ta un Arubano. Ela vocifera cu Betico d.f.m. a defini un Arubano como esun cu a nace na Aruba y tambe esun cu a haci di Aruba su cas. Bunita palabranan hopi conmovedor pa mi persona, mi ta spera Prome Minister eherece e grandesa di biba e palabranan di nos Libertador cu rigor. Na Aruba actualmente tin un grupo grandi di probablemente mas cu 10,000 persona indocumenta. Aunke porta nan no a nace na nos pais, aunke porta nan no ta goza di nacionalidad Hulandes, nan a scoge pa haci nan bida cerca nos. E personanan aki hunto cu nan famianan ta biba, traha, studia hunto cu nos, NAN A HACI DI ARUBA NAN CAS.

Mi ta kere si berdad Sra. Wever-Croes kier goberna den espirito di nos Libertador a yega ora pa nos cuminsa registra esnan indocumenta y nan famia y duna nan e dignidad mereci di a scoge Aruba como nan cas. Mescos cu introduci matrimonio pa parehanan di mesun sexo, brinda esnan indocumenta status legal lo brinda nan siguransa huridico y garantisa cu nan tambe ta pertenece na e gran famia di Arubano. E adelantonan aki inspira pa palabranan di nos Prome Minister y nos Libertador lo unicamente fortalece nos pais. Lo nos ta siguiendo cu e soño di nos Libertador di crea un pais mas inclusivo cu ta refleha e miho balornan di e Arubano. Mi ta carga speransa cu nos Prome Minister lo tuma accion riba e bunita palabranan cu ela comparti den Parlamento pa en berdad keda leu di discriminacion y reconoce tur Arubano cu a haci di Aruba nan cas.