Desde siman pasa te cu awe, ya ta 6 dia cu Parlamento ta den tratamento di Presupuesto di pais Aruba pa aña 2023. Un presupuesto cu a wordo entrega dia 1 di september cumpliendo asina cu ley despues di 15 aña bek. Cada dia a trata presupuesto di 2 ministerio apart y si no a caba riba un dia, a sigui pa un di dos dia riba e diferente ministerionan. E presupuesto aki a conta cu hopi atencion y critica di parti di oposicion cu hasta nan a entrega un carta di protesta. Pero e carta aki a wordo contesta pa Gobierno y cu motivacion di departamento di legislacion (DWJZ) riba e puntonan di oposicion. Parlamentario Setty Christiaans-Yarzagaray ta puntra su mes, si acaso Gobierno cumpli cu tur e puntonan treci dilanti pa oposicion den coalicion, esey lo haci cu nan lo vota pro pa presupuesto 2023?
Den e parti di splicasion riba presupuesto por bisa cu loke mas a resalta pa Parlamentario Christiaans-Yarzagaray ta cu economia di Aruba ta practicamente bek na e nivel di 2019 (pre-Pandemia) y cu proyeccion 2023 ta mustra cu danki na desaroyo Turistico cu ta apoya economia di Aruba por bisa cu nos ta “practicamente” na normalidad cu excepcion cu semper nos mester keda recorda e presencia di Covid den nos bida.
Riba diabierna ultimo, Minister President di pais Aruba y Minister di Finansas y Cultura a presenta un nota di cambio riba e ley di presupuesto 2023 cu ta ilustra un mehoracion den panaroma. Cambionan presenta ta basa riba un proyeccion economico revisa door di departamento di asuntonan economico (DEACI). E nota aki ta informa cu e pronostico nobo ta cu economia lo crece cu 6.8% pa aña 2023 cu ta 1.7% mas cu e proyeccion anterior. E crecemento aki e ora tin su impacto riba entrada di pais Aruba cu pa caha gobierno kiermen 88 miyon florin extra.
Tambe lo bay ahusta e BBO cu 1% desde 1 di juni 2023 y alabes introduci’e na frontera cu tambe lo bay resulta den un entrada adicional pa caha di gobierno di 35 y 15 miyon florin pa aña respectivamente. Pandemia a haci Gobierno bira mas consciente di impacto di un crisis asina riba su gastonan y su falta di preparacion pa cu esaki pa cual a introduci un seguro di banda di bishitante. Esaki tambe a haya su proposicion di cambio den presupuesto 2023 door di “Instelling Begrotingsfonds Pandemische Veerkracht en Innovatie”. Esaki ta encera un cobransa di $15 pa un pasahero adulto cu lo mester sirbi parti pa e fonds aki mes y otro parti lo bay den caha di gobierno cu lo bay sirbi como un forsa financiero como resistencia den un crisis.
Finalmente proyeccionan ta mustra cu e resultado lo bay ta un surplus di casi 63 miyon florin contrario na e prome concepto di presupuesto cu a resulta den un deficit 25 miyon florin cu ta atrobe 88 miyon florin diferencia. E 63 miyon florin surplus aki ta traduci su mes den 1% di surplus pa pais Aruba relata na GDP cu no ta un resultado facil. Ta esfuersonan grandi di diferente actornan manera comercio sigur den area di turismo cu a contribui grandemente na crecemento economico pero tambe profesionalnan cu ta traha conhunto cu gobierno riba e presupuesto y nota di cambio. Sin laga afo esfuersonan grandi y incansabel di tanto Minster di Finansas, sra. Xiomara Maduro como Minister President di pais Aruba, sra. Evelyn Wever-Croes.
