Home » Parlamentario Marco Berlis (MEP) ta papia di; MIGUEL MANSUR DEN PARLAMENTO: KITA LMA Y KITA AMBTENAAR NA CANTIDAD.

Parlamentario Marco Berlis (MEP) ta papia di; MIGUEL MANSUR DEN PARLAMENTO: KITA LMA Y KITA AMBTENAAR NA CANTIDAD.

by Admin
0 comment 100 views

Diamars mainta Parlamento di Aruba a trata e ley di “suppletoire begroting.” E ley aki ta duna Parlamento un bista con gobierno a usa e placa di presupuesto 2022. Durante e trato di e ley aki, Mansur duna di conoce su postura con e lo baha e gastonan di personeel di gobierno, si e tabata sinta den e stoel di minister. No ta prome biaha cu Mansur a expresa esaki. El a grita cu LMA mester wordo kita! Dicon? Pasobra esey lo dun’e un autoridad total pa haci y deshaci cu ambtenaarnan y profesionalnan cu ta traha pa nos dushi pais Aruba. Docentenan, cu ta duna les na scol, mama cu tatanan cu ta sirbi den diferente departamentonan crucial di nos pais, cu ta traha duro pa pone pan riba mesa y cria nan famia, hopi lo mester wordo kita segun pensamentonan y expresionnan haci di Mansur. Esaki ta e famoso vision di Mansur pa nos pais. Un miyonario sin sentimento pa e pueblo cu ta bastante indigna cu e ambtenaarnan di pais Aruba.

Miguel Mansur contra pa ambtenaar haya e 12.6% bek
Pesey no ta nada straño cu sr.Mansur, cu ta yama su mes un representante di pueblo, ta scoge pa masacra ambtenaarnan sin misericordia! Sr. Mansur a vota contra di e dunamento bek di e 5%, cual a wordo duna bek na ambtenaarnan na juli 2022, y tambe contra e 7.6% cu lo mester wordo duna bek na januari 2023. Mi no kier ni imagina kico Mansur lo haci si un dia e mester drenta gobierno di Aruba. Corda pueblo di Aruba, ma taha!

Miguel a pidi un lista di Ambtenaar
Adicionalmente, Mansur a pidi un lista di tur ambtenaarnan, durante di e reunion publico. Mansur kier wak e nombernan y e cantidad di ambtenaar cu tin den e aparato gubernamental, pa wak kende por wordo kita. Mansur a sigui elabora cu 1500 ambtenaar mester bai for di e aparato publico. Segun Mansur mester mandanan bai traha den e sector priva. Despues di un rato, e la reitera cu e kier haci esaki gradualmente. Na diferente ocasion mientras minister Xiomara Maduro tabata papia y menciona su nomber, Mansur a bisa tur e cosnan aki. Mansur cu no tin ningun experiencia den gobernacion awor kier bin pretende cu gobierno mester reduci e aparato gubernamental cu 1500 hende. Ta kende tur e lo kier kita, mirando e kier e lista di nombernan di tur ambtenaar?

Manera ma bisa biaha pasa; “Miguel, bo no ta trahando den un negoshi, ta cu hende gobierno ta traha. Hende cu tin famianan, gastonan, soñonan, metanan y luchanan. Kita LMA, exigi lista di ambtenaar, vota contra 12.6% pa ambtenaar, kita 1500 ambtenaar, esey ta bo solucion? No tin otro manera con pa acapara cu e problemanan di nos pais? Pueblo saca bo som!”

Si pueblo desea mas informacion di e articulo aki, contact mi na tel: 528-4639 of email mi na: [email protected] / Bo parlamentario y sirbidor di pueblo na bo ordo semper!

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio