E organisacion a lanza na maart 2022 cu e meta di crea conocimento y stimula e prevencion di cancer di tripa riba nos isla.
Cancer di tripa ta den e top 3 tiponan di cancer mas comun na mundo. Ta pa e motibo aki, mester bin mas esfuerzo den nos comunidad pa educa nos populacion tocante e risico-, sintoma- y tratamientonan.
CORESA ta representa e palabranan COloREctal Screening Aruba, un fundacion nobo cu a nace for di e necesidad riba nos isla pa crea conocemento y stimula e prevencion di cancer di tripa.
E colon y rectum ta forma parti di bo dikke darm, cual ta parti di bo sistema digestivo. Cancer di tripa, tambe conoci como cancer di colon, cancer colorectal of cancer di rectum, ta un enfermedad cu ta causa e celnan den bo colon of rectum pa crece na un manera incontrolabel.
E ta importante pa nos comunidad ta na altura cu solamente 1 screening por salba bo bida, pa motibo cu e screening lo por detecta algo cu tin e potencial di bira cancer den futuro, y esaki por wordo elimina na tempo. E screening ta crucial pa cualkier persona desde cu nan haci 45 aña, hasta si nan no ta experienciando ningun sintoma di cancer di tripa. Si bo tin menos cu 45 aña di edad pero bo ta experienciando sintomanan, bishita bo dokter di cas pa e por evalua si bo mester haci un screening of si bo sintomanan por tin un otro motibo.
Fundacion CORESA a wordo lanta pa su directiva actual, cu ta consisti di su Presidente, Gastroenterologo Dr. Francis Christopher Franca; su Secretario, Ciruhano Dr. Justin Smit; y su Tesorero, Dokter di Cas Dr. Marcel Etienne Ho-Kang-You. E grupo aki di dokter a uni hunto pa crea Fundacion CORESA despues di un estudio amplio cu a wordo haci riba nos isla tocante cancer di tripa, unda cu a bin na cla cu tin un necesidad riba nos isla pa un fundacion cu ta enfoca ariba e educacion y prevencion di cancer di tripa.
Dia 19 di november proximo, Deaxo Croes ta bay pa e hazaña di ta e prome persona pa landa e trayecto di 53 kilometer entre e punto conoci como Red Slave na Boneiro te na Oost Punt na Corsou. E occasion aki, cual ta Crossing for Prevention, lo tin e meta di conscientisa nos islanan tocante e prevencion di cancer y beneficia tres fundacion; un riba cada isla ruman di e constelacion ABC. Di e manera aki, e fondonan recauda durante Crossing for Prevention lo wordo reparti entre Kankerfonds Bonaire, Caribbean Prevention Center na Corsou y Fundacion CORESA di Aruba. Tur donacion ricibi ta bay directamente na e cuenta bancario di cada fundacion.
Pa descubri mas tocante Fundacion CORESA, of si ta desea di haci un donacion, por bishita e website na www.fundacioncoresa.com. Keda na altura di cualkier desaroyo via Facebook of Instagram.