Den e tratamento di presupuesto di 2023 gobierno a presenta un Nota di Cambio pa trece Aruba na un Surplus di 63 miyon florin cual ta 1% di nos GDP. Un noticia cu ta trece un dinamica completamente nobo den e scenario pa Aruba. No solamente den e negosacionnan cu Hulanda y Rijksministerraad, pero tambe den e temporada nos dilanti na Aruba mes. Esaki ta crea un perspectiva y trankilidad politico diferente pa asina gobierno por enfoca riba con nos ta sigui fortifica nos economia y atende cu e retonan pa 2023.
Surplus di 1%
Con lo bay logra e surplus di 1%, ta atraves di dos proposicion. Introduccion di BBO na frontera y introduci un fondo di Resiliencia. BBO na frontera lo cobra compliance na momento di importacion. E consumidor lo aporta na comienso caba cu su pago fiscal. Esaki lo ta similar na BTW, y asina Aruba lo por ricibi 30 miyon florin pa aña. E fondo di Resiliencia ta loke cu tawata wordo cobra na tur viahero cu ta drenta Aruba tempo di Covid ta paga un seguro. Esaki lo continua cu un reparticion di 65% pa caha di pasi Aruba y 35% cu lo bay pa un fondo pa ICU. Asina lo por bay amplia e camanan di ICU di 5 pa 12 cu ta e standaard cu mester pa futuro crisis. Naturalmente e cambio di BBO pa BTW ta un ley riba su mes y e conseho pa e ley ey ta na Raad van Advies caba y lo yega Parlamento y djey lo por trata e reunion ey. Eyden nos lo profundisa ariba e detayenan di BBO na frontera y debati ariba esaki incluiendo esun di fondo di Resiliencia.
Presupuesto 2023 su ruta
Pa kita tur duda, e presupuesto 2023 a pasa Raad van Advies y nan a duna conseho ariba e presupuesto. CAFt a duna su conseho riba esaki tambe y ta bon pa splica cu como cu a cambia den entradanan so, e presupuesto no tin nodo di bay bek Raad van Advies, solamente cu si mester a cambia den e gastonan e ora si e presupuestonan lo mester a bay bek Raad van Advies, cual no tawata e caso. Asina cu e ley di presupuesto caba di wordo trata e lo bay pa CAFt atrobe contrario na loke ta wordo pretende pa oposicion y mal interpreta pa trece division den pueblo.
Dia 1 di september a entrega presupuesto 2023, algo historico cu despues di 15 aña a sosode. Mas ainda cu entrega na tempo e ta un presupuesto cu un Surplus di 63 miyon florin pa Pais Aruba. E ultimo surplus tawata na 2019 kiermen riba su mes si bo conta e tres añanan duro di pandemia nos tras e surplus aki ta un logro grandi.
Mi ta kere cu ta na su lugar pa reconoce e maneho responsabel y firme cu minister di Finansas y su team a ehecuta. Mi kier encurashanan pa sigui enfoca riba e retonan nos dilanti pa 2023. Laga nos enfoca pa sigui resolve e problemanan y enfrenta e retonan pa Aruba por sigui crece y avansa economicamente y financieramente.