Diabierna 11 di november 2022 nos a start e di 5 dia tratando presupuesto di pais Aruba pa aña 2023. Nos a cuminsa trata e 2 ultimo 2 ministerio di e Presupuesto, esta nos a trata Ministerio di Asuntonan General, Inovacion, Organisacion Gubernamental, Infrastructura y Planificacion Territorial y Ministerio di Finansas y Cultura.
Mas cu claro mi mester a inicia mi desertacion gradiciendo y felicitando e dos damanan encarga cu e ministerionan aki, Ministernan Evelyn Wever-Croes y Xiomara Maduro, pa nan trabou duro realisa pa nos pais cu hopi determinacion y curashi. Alabes pa ta e motornan cu presupuesto di pais Aruba despues di 15 aña ta keda entrega na e fecha stipula pa ley y pa a traha serio y responsabel pa a presenta un presupuesto cu ta refleha trabou duro pa sanea nos finansas publico. Pasobra con cu bo kier bire, den 3 aña di tempo nan a logra reduci e deficit presupuestario di 1028 miyon florin di aña 2020 te na un surplus di 1 % otro aña cual ta casi 63 miyon florin.
Mi a enfatisa cu esaki sigur ta muestra di un tremendo trabou di equipo di no solamente tur minister, principalmente di MinPres y Minister Maduro, pero tambe di tur e profesionalnan den sector publico. Nos no por lubida cu pa aña 2020 Gabinete Wever-Croes a premira un surplus di 46 miyon florin, pero e pandemia di Covid-19 a presenta y a cambia e panorama financiero y nos mester a aproba un presupuesto cu un deficit di 1028 miyon florin. Gobierno a traha duro y na un manera serio pa e añanan cu a sigui keda baha e deficit mas cu por. Den aña 2021 a reduci e deficit te na 534 miyon y aña 2022 a presenta un deficit na prome instante di 148 miyon y awo cu Cambio di Presupuesto 2022 Gobierno ta bay reduci e deficit aki te na 92 miyon florin.
Awe mainta nos a keda presenta cu un nota di cambio caminda pa aña 2023 Gabinete Wever-Croes a logra trasforma e deficit di 25 miyon florin anteriormente stipula den un surplus. Algo cu sigur nos mester aplaudi. Awor Gobierno por bay sigui traha riba recuperacion di nos economia y atende cu tur e retonan di aña 2023.