Home » Minister Maduro di Cultura a pasa admira e obranan di diferente artista local na Aruba Art Fair

Minister Maduro di Cultura a pasa admira e obranan di diferente artista local na Aruba Art Fair

by Admin
0 comment 54 views

Den su bishita na Art Fair Aruba, Minister Maduro di Cultura a haya oportunidad di pasa admira e obranan di diferente artista local. Entre nan, Armando Goedgedrag, Elisa Lejuez y Paul Wong.

Mural di Armando Goedgedrag
Na comienso di Caya Principal di San Nicolas, Minister Maduro a pasa saluda Armando Goedgedrag kende tabata trahando riba su mural dedica na e flornan di nos Pais. E obra yama ‘Melting Pot’ y ta dedica na tur e diferente nacionalidad, cultura y etnicidad presente na Aruba. Cada flor cu nos por admira den nos cura of den naturalesa rond di nos, ta representa un di nan. Tin flornan cu no ta original di Aruba, pero tur ta nace aki y ta florece bunita den nos naturalesa. Ta bale la pena pa tuma un rato pa admira y disfruta di e detayenan cu naturalesa ta brinda pa alegra nos curason.

Elisa Lejuez Art & Fashion
Minister Maduro a haya oportunidad pa topa tambe cu e artista Elisa Lejuez, kende a participa den e show di moda di ‘Art Fashion’ cu su coleccion di sjaal. Elisa ta conoci pa su cuadranan den colornan vibrante y durante e show di moda a presenta tambe su bunita coleccion di sjaal. Pa e ocasion, Minister Maduro a ricibi un bunita sjaal como recuerdo di e presentacion di Elisa na e Art Fair Aruba.

Art by Paul Wong
E mandatario tabata tin e placer pa topa tambe cu e artista Paul Wong cu a mustra Minister Maduro su bunita pinturanan. Paul tin un tremendo talento pa e arte di airbrush cu nos por admira riba diferente mural, auto y brommer. Un bunita detaye ta, cu tur benta di Paul su obranan di arte durante Art Fair Aruba a bay como donacion pa Casa Cuna. Hopi danki Paul pa e bunita gesto aki pa nos muchanan. Un otro bunita detaye ta cu Paul ta e artista cu a ilustra e buki ‘Natura-lesa’ cu ta e buki cu nos muchanan a haya regalo den e ‘Siman di Buki 2022’ di Biblioteca Nacional.

Talento cu ta inspira
Minister Maduro ta gradici sr. Tito Bolivar di Art Fair Aruba pa a trece nos artistanan local hunto pa asina deleita local y bishitante cu nan talento unico. Masha danki na tur artista cu a participa. Aruba ta bendiciona cu hopi talento cu ta inspira. Danki pa kere den Aruba.

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio