A pidi pa amor y alegria como regalo pa tur mucha
Diadomingo mainta Minister Maduro di Cultura a yama Sinterklaas y su Pietnan bonbini na waf di Harbour Arena. Dilanti un multitud grandi di mucha presente na waf, e mandatario a splica Sinterklaas cu tur mucha a haci bon mucha na Aruba y ta pidi Sinterklaas pa trece e regalo di mas bunita pa tur mucha, cual ta amor y alegria. Sinterklaas a sorprende Minister Maduro cu e bunita buki ‘Academia di Piet’ den cual Sinterklaas ta splica tur e cambionan cu tin cu e celebracion di Sinterklaas y su Pietnan di color. Cada color tin un bunita nificacion y pesey e biaha aki Sinterklaas ta desea pa tur mucha haya sa di nan. Minister Maduro a yama Sinterklaas masha danki pa e bunita buki aki y e bisa Sinterklaas cu elo percura pa nos muchanan haya e buki aki na scol y pa e ta accesibel tambe na forma digital pa tur nos muchanan. Despues di e yamada di bonbini, Sinterklaas y tur su Pietnan a bay den un caravana compaña pa e coro di ‘Muchanan Sabi’ di Edselyne Figaroa, hunto cu Quality brassband y nos Reinanan direccion pa Plaza Padu unda tabata tin un fiesta prepara pa e muchanan disfruta di e yegada di Sinterklaas y su Pietnan na Aruba. E yegada di Sinterklaas a wordo masha bunita ricibi pa un cantidad grandi di muchanan den Harbour Arena, riba e ruta di e parada y tambe riba Plaza Padu. Nos muchanan a goza di e evento organisa cu hopi amor pa nan. Minister Maduro ta gradici Comision Celebracion Dianan Nacional hunto cu Aruba Bank, Setar, APA y tur otro patronisador cu a yuda pa e bunita evento aki por a wordo organisa pa nos muchanan.
