Minister Dangui Oduber E AÑA AKI DIA MUNDIAL DI DIABETES TA ENFOCA NA E ACCESO DI EDUCACION DI DIABETES

ORANJESTAD – Diabetes ta wordo categorisa como un malesa no transmitibel. E malesanan aki tin e tendencia di un duracion largo y ta e resultado di un combinacion di factornan. Diabetes por ta genetico of por desaroya dor di un bida no saludabel. Diabetes ta causa problemanan cardiovascular, ceguera, problema cu riñon y amputacion di pia. Na Aruba tin casi 10 mil persona cu ta uza un remedi pa diabetes cu ta representa 8% di e poblacion. Minister Oduber a menciona cu diabetes tin atencion di Gobierno y ta forma parti di e plan nacional di prevencion di malesanan no transmitibel.
Tur aña e Dia Mundial di Diabetes ta enfoca riba un tema specifico. E tema cu WHO a scohe e aña aki ta pa duna acceso na e educacion di diabetes. E dia aki ta un bon oportunidad pa sigui conscientisa nos comunidad riba diabetes, pa hiba un bida mas saludabel pa asina preveni cu bo ta bira un diabetico.
Minister Oduber a expresa cu na Aruba tin enfermera specialisa den e cuido di persona cu diabetes (Diabetes verpleegkundigen) y enfermeronan cu a haci e opleiding di Praktijkondersteuner, conoci como P.O.H. Parti grandi di e opleiding aki ta dedica na e cuido y guia di e diabetico. Banda di esaki Aruba ta conta cu Centro Diabetico cu ta specialisa den e cuido di e pashent diabetico. Ademas tin un Fundacion Diabetico cu tin como meta pa crea conciencia den e comunidad di Aruba tocante diabetes y mehora e calidad di bida di e persona diabetico. Tambe pronto Aruba lo tin un Healthy Lifestyle Center, den cuadro di prevencion.
Mandatario Dangui Oduber ta splica cu den cuadro di prevencion, su persona ta haya cu ta di sumo importancia pa conscientisa comunidad riba por ehempel e consumo di sucu y e efecto cu e tin riba salud. Sucu ta un producto cu hopi lihe ta contribui na sobre peso y tambe na malesanan cronico. Tin estudionan hopi extenso haci cu ta demostra con esaki por causa cancer y hopi otro malesa mas. “E problema mas grandi ta cu sucu ta practicamente den tur cos cu nos ta come y bebe. Ta yega momento pa nos para keto y realisa kico nos ta alimenta nos curpa cu ne”.
E mandatario a sigui bisa cu a keda demostra cu dor di mantene un peso saludabel, participa na actividad fisico y un alimentacion saludabel bo por baha e risico pa haya diabetes tipo 2. Tambe ta un hecho cu un persona diabetico por logra regula e nivel di sucu den su sanger y consecuentemente baha e risico pa complicacion, door di haci cambionan na estilo di bida y uzando su remedinan manera prescribi.