Pa sea integro ta exigi un base di moralidad pero pa atende cu (falta di) integridad ta exigi un base legal. Durante siman Gobierno di Aruba a cuminsa trata e presupuesto 2023 den Parlamento di Aruba. Minister Arends tabata tin e oportunidad pa trece aclareacion riba presupuesto di su ministerionan cual ta Transporte, Integridad, Naturalesa y Asuntonan di Adulto Mayor. A contesta diferente pregunta di Parlamentarionan presente y por bisa cu e tema cu a resalta ta e tema di integridad y locual cu Bureau Integriteit Aruba (BIA) y Ministerio di Integridad a bin ta traha ariba.
Un di e proyectonan recien ta e Congreso Consultativo di Corporate Governance cu tin como meta pa duna splicacion tocante e concept Landsverordening Corporate Governance y e concept Code Corporate Governance. Cu ta incluistakeholders y otro interesadonan cu a participa den e proceso. Esaki ta un ehempel di democracia participativo, algo cu ta cuadra cu e vision di Minister Arends. Parlamento a wordo informa di e proceso aki y a ricibi tur documento relevante.
Un di e tareanan di BIA ta pa provee cursonan relaciona cu integridad. Den e cuadro aki BIA recientemente a tene un curso exitoso pa directornan. Alabes ta trahando ariba introduccion di Vertrouwenspersonen Integriteit, Interne Onderzoekers, y e Landsverordening. Pa loke ta trata contractnan di servicio, conoci como Dienstverleningsovereenkomsten (DVO’s) y Overeenkomsten van Opdracht (OVO’s), Minister Arends a presenta richtlijnen pa regula y preveni mal uzo di e tipo di contractnan aki. E ‘Richtlijnen voor het aangaan van overeenkomsten van opdracht’ a wordo aproba den ministerraad y ta valido pa tur ministerio. Minister Arends a pone nan ter inzage den Parlamento. Pronto lo trata e Gedragscode Ministers den ministerraad.
Otro proyectonan cu a wordo menciona:
Aruba Integrity Strategy, un plan riba escala grandi pa coordina implementacion di proyectonan relaciona cu integridad di pais Aruba.
Active Transparency Project, actualmente esaki ta plania pa lansa prome cu e aña caba. Un proyecto pa structuralmente y activamente percura pa mas transparencia gubernamental.
Integrity Week, un siman di conscientisacion pa promove integridad y preveni corupcion. E meta ta pa enfoca riba e derecho y responsabilidad di cada ciudadano pa cu esaki.
Minister Arends ta enfatisa cu mester cuminsa haci e esfuersonan necesario pa por hiba nos den e direccion di haci procesonan gubernamental transparente. “For di mi ministerio, nos ta trahando ariba esaki por medio di digitalisacion. Haciendo procesonan gubernamental transparente pa un y tur, cu lo por preveni actonan coruptivo y iregular”, Minister Arends ta reacciona.