Entrada Hudicial na un cas cu varios biaha a haya bishita di autoridad, sospechosonan tambe conoci di polis. Un di e sospechosonan a logra huy for di man team di aresto.
Casibari: Diahuebs den careda di 6’or di atardi, un team consistiendo di team di aresto, recherchenan di diferente districto y Ministerio Publico a drenta un cas na Casibari, e adres aki ta hopi conoci caba pa autoridad, no ta prome biaha cu autoridad ta presenta na e cas aki y ta efectua detencion.
Menasa y tiramento
E entrada hudicial e biaha aki tabata relaciona cu un caso di tiramento cu a tuma lugar diaranson anochi na Esso Heights. Diaranson anochi, na un adres na Esso Heights lo a surgi un problema pa motibonan amoroso y celos a hunga un rol, durante un discussion fuerte di pareha, un di e sospechosonan lo a menasa su ex pareha cu morto y tambe a saca un arma di candela y a los mas di un tiro den halto.
Un a bolbe cay cera y e otro a huy
Team di Aresto a wordo pidi pa efectua e detencionnan na e cas aki, na momento cu team di aresto a drenta detene e sospechosonan, aparentemente lo tabata ta trata di un mama y un yiu. Pa un motibo of otro e yiu lo a logra scapa for di man di Team di Aresto y e la huy for di e cas. E mama si a keda y segun nos a compronde recientemente e lo a sali for di KIA, pa un otro caso.
Droga
Durante e entrada hudicial aki, autoridad a bin topa cu un cantidad grandi di droga scondi den e cas. E adres aki ta conoci caba na autoridad, cu ta un cas caminda varios cosnan ilicito ta sosode. Entre otro bendemento di droga, pa cual den pasado e senjora aki lo a wordo deteni caba pa un caso di droga.
Buskeda
Despues cu Team di aresto a nota cu un di e sospechosonan a huy, mesora nan a inicia cu un buskeda. Team di aresto tabata busca den mondinan cerca di e cas y tambe riba e tereno rond di e cas, den matanan, pero sin resultado. Tambe a pidi pa presencia di mas patruya di polis pa asisti e recherchenan na e adres aki.
Mama deteni
Transportwagen a busca e mama y a transport’e pa warda di polis. Team di aresto, Recherchenan y Fiscal a keda na e sitio wardando pa mira si e sospechoso cu a huy lo bin bek y entrega su mes.
