ORANJESTAD, Aruba –Recientemente a tuma lugar e Special Olympics Aruba Health Forum. Dianan 3 te cu 6 di november ultimo atletanan di Special Olympics por a bishita Centro Deportivo Betico Croes na Santa Cruz pa un chekeo medico gratis y pa participa na diferente combersacion cu topico di salud. Nadine Van Der Woude di Digicel ta comenta cu na Digicel e involvimiento cu Special Olympics ta un sentimiento di orguyo pa henter e compania, pa motibo cu nan ta sinti parti di e fundacion. “Nos ta balora y admira e contribucion cu Special Olympics ta haci den nos comunidad, y de facto rond mundo, ya cu nan ta traha na bienestar di tur esnan cu disabilidad intelectual”.
“Mi ta particularmente orguyoso di por a dirigi palabra na publico presente. Mi ta sigur cu mi por papia pa nos tur na Digicel ora cu mi bisa con agradecido nos ta pa e bon colaboracion. Nos ta felicita Special Olympics Aruba cu un bunita programa”, asina Nadine Van Der Woude, Marketing Manager di Digicel a bisa. “Na Digicel nos ta realmente kere cu di berdad ‘Nos ta hunto, Mas miho..’ y ta importante pa cada bes di nobo nos compromete nos mes na crea impactonan positivo den cual e poder di inclucion y trabou den equipo ta keda subraya. Nos ta felicita Special Olympics Aruba cu un exitoso Aruba Health Forum”. Otro oradornan cu tambe a hiba palabra ta Dr. Esther Vermeulen, experto den nutricion y propietario di Vitality By Esther, tambe Cheryl de Graf un enfermero specialisa den diabetis y Dr. Dawn Lawson un optometrista di Jamaica cu a bin Aruba specialmente pa e Health Forum.
Special Olympics Aruba Health Forum a percura pa un programa hopi activo cu e.o un actividadnan deportivo manera volleyball y bolas, un espacio na unda cu a promove un estilo di bida saludabel, a duna diferente charla riba topiconan di salud e.o Diabetes y Nutricion. Riba e di dos dia a pasa dor di 6 booth di salud, cuminsando cu un checkeo medico y siguiendo cu examen di wowo. E focus di e checkeo medico tabata optometria, sinembargo Special Olympics a desaroya 9 pilar pa un programa saludabel pa e atleta. E programa aki ta activo den henter Caribe. E focus di e programa ta pa sigura cu e atletanan special no unicamente ta wordo inclui sino cu nan por cuida nan curpa tambe, ricibi cuido medico y tuma medida si esaki ta necesario. Por ehempel, e examennan di wowo a conclui cu algun atletanan special mester bisiti bril.
Digicel Aruba ta sumamente orguyoso di por tabata un di e patrocinadornan. Special Olympics Aruba por sigui conta cu e sosten di Digicel, manera a bin ta hasi ya pa 19 aña consecutivo. Digicel ta encurasha comunidat di Aruba pa sostene e atletanan special. Un comunidad cu ta inclusivo ta permiti e muchanan special desaroya nan talentonan di manera cu nan tambe por contribui na Aruba. E atletanan special lo representa Aruba proximamente na Berlijn, Alemania pa World Games 2023.
