ORANJESTAD: Diasabra ultimo e proyecto “Op Zoek naar Boy” a yega na su final cu e develacion di un mural y un obra di teatro dedica na nos heroe di segunda guera mundial Boy Ecury. Un hoben balente y integro cu sigur ta un ehempel pa nos tur. E proyecto a wordo lansa na luna di februari di e aña aki como un homenahe pa e hoben heroe di Aruba cu a duna su bida dia 6 di november 1944 pa libertad di Aruba y Hulanda. Den un bunita ceremonia na Filomena College den presencia di Gobernador di Aruba, sr. Alfonso Boekhoudt y distinguido esposa, Minister Endy Croes, Minister Xiomara Maduro, Parlamentario Alvin Molina, famia y demas invitadonan special a devela e bunita mural aki.
E proyecto ta un colaboracion entre Stichting Cultuurgeneratie, Colegio San Antonio, Filomena College Mavo, Muchila Creativo, MBO Media Collge Amsterdam y Monumentenfonds Aruba. E artista local Esmeralda Kelly a crea un bunita mural riba e muraya na Filomena College, inspira pa e ideanan di e studiantenan durante workshopnan bou di direccion di Esmeralda Kelly y Rudberth Wolff. Despues di e ceremonia, invitadonan a dirigi nan mes na escenario principal Art Fair unda studiantenan di Colegio San Antonio a presenta un tableau vivant cu acompañamento musical di alumno y maestronan di Muchila Creativo.
Concluyendo Minister Endy Croes ta felicita sra. Esmeralda Kelly cu e bunita mural como tambe palabranan di pabien pa e alumnonan di Colegio San Antonio y Muchila Creativo pa nan excelente presentacion. Mandatario di Enseñansa ta gradici Fonds voor Cultuurparticipatie, Gemeente Amsterdam y Departamento di Cultura Aruba, alumno, scol y mayornan cu a haci e proyecto aki posibel.
