Oranjestad, Aruba (6 november 2022) – Alrededor di 8:12 p.m. Aruba henter a keda sin coriente. Mesora ELMAR a cuminsa mobilisa tur tecnico pa asina ta pendiente di e situacion. Nos a ricibi informacion pa 8:29 p.m. for di WEB cu un interupcion den produccion di coriente den planta di WEB a causa un black-out. For di e momento aki nos tecniconan tabata den comunicacion constante cu WEB.
Pa 9:10 p.m. nos tecniconan tabata staciona na nos onderstationnan y pendiente pa WEB reestablece produccion di coriente pa asina nos por cuminsa suministra coriente bek. Pa mas o menos 9:22 p.m. ELMAR a wordo notifica door di WEB cu por a cuminsa suminstra coriente bek den algun area. Durante henter e proceso aki ELMAR a keda monitoria e stabilidad y suministro di coriente. Pa 9:35 p.m. suministro di coriente a ser reestableci den e area di Avenida Milo Croes, Kooyman y vecindario.
Pa 9:39 p.m. a surgi un biaha mas un problema den e planta di WEB cu a ocasiona un di dos black-out. Nos tecniconan a keda ‘stand-by’ pa asina cu WEB soluciona e problema, nos por sigui suministra coriente bek.
Pa 10:01 p.m. a cuminsa suministra coriente den e area di Balashi, Savaneta Zuid y vecindario. Pa 10:03 p.m. a cuminsa suministra coriente den un parti di Santa Cruz. Pa 10:06 p.m. suministro di coriente a ser reestableci den e area di Balashi, Pos Chikito, TeleAruba, Santa Cruz, un parti di Savaneta y vecindario.
Pa 10:23 p.m. a cuminsa suministra coriente den e area di Hospital, Bubali, un parti di Palm Beach, La Cabana y vecindario. Pa 10:25 p.m. suministro di coriente a ser reestableci den e area di Paardenbaai, Punta Brabo, Manchebo, Schelpstraat y vecindario.
Pa 10:46 p.m. a cuminsa suministra coriente den e area di San Jose, Arawak, Palm Beach y vecindario. Pa 10:51 p.m. suministro di coriente a ser reestableci den e area di Airport, Garage Cordia, PriceSmart, CMart y vecindario.
Pa 10:57 p.m. suministro di coriente a ser reestableci den e area di Moko, Paradera y vecindario.
Pa 11:03 p.m. a cuminsa suministra coriente den e area di Keito, un parti di Noord, Washington y vecindario. Pa 11:04 p.m. suministro di coriente a ser reestableci den e area di Tanki Leendert, un parti di Oranjestad y vecindario.
Pa 11:07 p.m. suministro di coriente a ser reestableci. Aruba henter tabata tin coriente bek.
Pa 11:38 p.m. nos a confronta un interupcion den e distribucion di coriente na un parti di e area di Seroe Blanco. Di biaha nos tecniconan a mobilisa pa atende cu esaki. Pa 4:03 a.m. suministro di coriente a ser reestableci den e area di Seroe Blanco.
ELMAR a percura pa provee ‘updates’ continuo via nos pagina di Facebook pa mantene e comunidad di Aruba bon informa.
ELMAR su team completo a traha incansabel pa atende cu e situacion di black-out y reestablece suministro di coriente bek na Aruba. Nos ta gradici nos tecniconan pa nan dedicacion. ELMAR ta gradici e comunidad di Aruba pa e pasenshi durante e interupcion den produccion di coriente cu tabata fuera di nos alcance.