Home Politics Minister Ursell Arends: Luna di adulto mayor ta clausura pero e trabounan...

Minister Ursell Arends: Luna di adulto mayor ta clausura pero e trabounan na nan bienestar ta continua

SHARE

Durante ful luna di october, proclama como e luna di nos adultonan mayor,un adelanto excepcional a wordo haci pa loke ta trata e vision y maneho na bienestar di e grupo den nos comunidad cu a lanta nos, esnan cu a aporta grandemente na e fundeshi di nos Pais.

“Desde comienso nos adultonan mayor nan cuido y bienestar tabata halto entre e puntonan di prioridad, y di ora mi a tuma e encargo como Minister di Asuntonan di Adulto Mayor a haci esfuersonan pa cuminsa cana e caminda pa cumpli na duna nos adultonan mayor e atencion cu nan merece. Nos tin un caminda largo pa bai, y tin hopi mas trabou pa haci pero mi ta contento pa bisa cu tin tremendo colaboracion y confiansa di parti nos adultonan mayor y stakeholders den e ministerio pa traha un maneho na nan bienestar”, Minister Arends a comenta. Asina ta segura su compromiso cu e grupo aki cu ta ocupa alrededor di 23% di Aruba su poblacion y segun stadistica ta creciendo mas ainda.

Na comienso di e luna, Directie Ouderenzaken a bira un realidad. Un departamento cu lo percura pa colaboracion, servicionan tanto di cuido y social adecua, sosten pa cuido informal, optimalisacion y rendibilidad di cuido y tambe pa stimula participacion di nos adultonan mayor den sentido amplio. E realisacion di e departamento aki a wordo realisa despues di un restructuracion. Ta bon pa remarca cu Dienst Ouderenzorg tawata un organisacion gubernamental existente bou maneho di Directie Volksgezondheid(DVG). Minister Arends a tuma e decision pa transforma e Dienst den un Directie riba su mes, unda tin mas control riba e maneho y asina centralisa tur loke ta resorta bou nos adultonan mayor bou un solo capa. Pues asina restructura na un manera cu lo haci uzo di recursonan actual pa loke ta trata nos profesionalnan cu ta den e sector publico caba.

Tambe for di ministerio di Asuntonan di Adulto Mayor a aloca fondo pa realisa Congreso Active Aging di Movimento ta Bida cu e meta pa trece conscientisacion riba mehoracion di e calidad di bida y preparacion pa cu esaki.

Pa reinforsa e compromiso cu Minister Arends tin cu nos pioneronan mayor, a percura conhuntamente cu Club Kibrahacha pa reinicia e telefon pa Adulto Mayor uzando e number #125 cu e slogan ‘Mi ta inclui’, paso tur hende merece di sinti nan mes balora y inclui den nos comunidad. Nos adultonan mayor nan conocemento y experiencia lo sigui guia nos pa awo y pa semper.

Minister Arends y su ministerio a tuma e oportunidad den conexion cu luna di adulto mayor pa presenta e maneho na varios grupo di adulto mayor, duna reconosimento nan nos baluartenan y tambe a organisa diferente charla informativo hunto cu Directie Ouderenzaken, Central Bureau of Statistics Aruba y expertonan. Topiconan manera cuido, demencia, finansas cu ta relevante pa adulto mayor a ser trata durante e charlanan aki. Por mira e charla riba e pagina di facebook di Directie Ouderenzaken.

Pa loke ta trata casnan di cuido, a logra entrega permiso na 6 cas di cuido cu ta cumpli cu rekesitonan pa asina por opera. Tin cu menciona cu actualmente tin un proyecto piloto andando pa loke ta trata control riba e calidad di cuido y bienestar di e cliente. Tambe Ministerio di Adulto Mayor a aloca fondo pa asina amplia Cas Marie su ora di servicio na 5 dia pa siman y asina sigui ofrece e tremendo servicio cu nan bin ta duna na nan clientenan cu demencia/alzheimer.

Pa clausura e luna di adulto mayor, Minister Arends ta manda palabra di gradicimento na tur adulto mayor, nos baluartenan, fundacionnan, grupo di bario, organisacionnan di sector publico y priva, y sin lubida tur boluntarionan cu ta atende directamente cu nos adultonan mayor.

“Danki pa haci luna di adulto mayor un exito, yena cu actividad, informacion y mas cu tur cos danki pa tin e curason pa atende cu nos pioneronan mayor, como Minister di Asuntonan di Adulto Mayor, mi lo sigui enfoca riba desaroyo positivo y participacion activo pa nos adultonan mayor,” Minister Arends ta conclui.