Oranjestad – E aña aki Aruba Bank ta celebra hunto cu Biblioteca Nacional e di 30 aniversario di Festival di buki pa Mucha 2022. Un festival cu ta enfoca riba muchanan di kleuter y basis schoolnan di Aruba. E festival aki ta ofrece e oportunidad pa conecta cu e muchanan, autornan y ideanan tur basa riba e importancia di lesamento.
Lesamento ta mehora e memoria y abilidad cognitivo, pues esaki ta un habito hopi positivo pa adopta y asina por yuda un mucha paden y pafor di klas. Tambe lesamento ta yuda un mucha su mente pa procesa informacion den diferente manera y engrandece su vocabulario.
En conexion cu e aniversario, a lansa un “jubileumboek” di e 30 aña di Kinderboekenfestival. Esaki a bira un buki di cantica, e 30 cantica cu a uza durante tur e Kinderboeken festivalnan den transcurso di añanan. Aruba Bank ta contento di por a patrocina e bunita buki aki cu redaccion di Sophiene Maduro-Verheagh y illustracion di Vanessa Paulina.
Dia 4 di november tawata tin e apertura di Festival di Buki pa Mucha 2022 den Cas di Cultura. Aruba Bank ta encurasha comunidad pa pasa visita e numeroso actividadnan relaciona cu Festival di buki, manera Exposicion di Festival di Buki, Presentacion di Autornan y mercado di buki na Biblioteca Nacional.