Home Politics Parlamentario Marco Berlis (MEP):  Presupuesto 2023 ta un logro grandi pa...

Parlamentario Marco Berlis (MEP):  Presupuesto 2023 ta un logro grandi pa gobierno

SHARE

 

Gobierno ta logra baha e deficit di 1028 miyon causa door di pandemia y ta premira un presupuesto balansa of un surplus chikito

 

Pronto presupuesto 2023 lo wordo trata den Parlamento di Aruba. E presupuesto aki ta un muestra grandi di e enfoke y seriedad cu cual nos gobierno ta trahando pa nos pais. Gobierno di Aruba a splica recientemente cu e economia di Aruba a crece di un forma formidable. Pais su entradanan tambe a subi y gobierno a usa e placa aki pa baha e deficit di presupuesto 2022 di 227 miyon pa 148 miyon, y aworaki probablemente di 148 miyon pa alrededor di 113 miyon. Ademas nos por a wak cu Banco Central di Aruba a saca e rapportnan di e prome y di dos kwartaal den cual e ta declara cu e economia di Aruba a crece cu 16.2% y 5.7% respectivamente compara cu 2021. Nos turismo, nos pilar economico di mas importante a produci recordnan den e ultimo 6 lunanan compara cu 2019, cu tambe tabata un aña record pa nos pais. Tur e factornan aki ta contribuyendo cu gobierno por manda pa Parlamento un presupuesto 2023 cu un deficit chikito y hasta a bisa cu un nota di cambio lo por bin, cu lo indica un presupuesto balansa of cu un surplus chikito. 

 

Como representante di pueblo mi kier pone enfasis riba e logro aki. Pakico? Pasobra nos trabao ta pa controla y cuestiona gobierno, sinembargo ora tin logronan importante pa nos pais, mester elogia esakinan tambe. Alabes e ta importante pa remarca cu esaki no ta e prome biaha cu Gabinete wever-Croes a logra un surplus chikito. Na aña 2019 tambe a logra esaki. 

 

Pa Aruba por drecha, mester drecha e economia, mantene un nivel aceptabel di gastonan publico y subi entradanan di pais Aruba. Esaki semper mester ta e meta. Di e forma aki pais Aruba por cuminsa paga y baha e megadebe desastroso cu e signatura berde a laga atras. Den ocho aña di gobernacion di AVP semper a laga deficitnan atras entre 180 miyon pa casi mey biyon pa aña. Tur hende por goberna tira cu placa y construi proyectonan di un forma irresponsabel. Esaki a costa pueblo cu nos economia, GDP y pais a keda hipoteca pa mas di 90%. Presupuestonan di AVP cu hasta gobernador a rehusa pa firma, pasobra e deficitnan y konkelmento den esaki tabata grandi. Esaki Gradus di Caft mes a declara den un entrevista cu Rene de Zwart na 2018. 

 

Ta pa e motibo aki e presupuesto di 2023 ta duna pueblo speransa atrobe cu nos ta riba e bon caminda di recuperacion. Pueblo por a wak cu hasta Hulanda a kita aanwijzing, y cu gobierno ta haciendo e trabaonan necesario pa logra un presupuesto cu ta acceptable pa RMR. Secretario di Estado Alexandra van Huffelen a reconoce esaki publicamente. Naturalmente ainda falta hopi mas pa logra e recuperacion di nos pais, sinembargo cu pasonan chikito y stabiel nos economia poco poco lo wordo salba.

 

Si pueblo desea mas informacion di e articulo aki, contact mi na tel: 528-4639 of email mi na: marco.berlis@parlamento.aw / Bo parlamentario y sirbidor di pueblo na bo ordo semper!