Tur cos ta cla pa mayan atardi den Cas di Cultura nos bisti di gala y celebra e di 10 edicion di Kids & Teens Christmas Song Festival cu un total di 30 participante di cual tin 2 duo.
E aña aki Kids & Teens Christmas Song Festival ta celebrando su di 10 y ultimo edicion di e festival di Pasco na Aruba pa mucha y hoben.
Manera tur aña por tuma 30 participante, 10 participante den cada categoria cu cancionnan di pasco na Papiamento.
E aña aki e di 10 edicion di Kids & Teens Christmas Song Festival lo ser dedica na KATATUMBO pa nan aporte y dedicacion na e temporada dushi di fin di aña pa hopi aña y pa celebra esaki engrande lo tin un solo presentacion di Katatumbo mayan den Cas di Cultura.
Tur participante ta wordo acompaña pa e mesun All Star Band di e festival bao encargo di Sr. Danny Koolman.
Tin 3 categoria cual ta:
04 pa 07 aña
08 pa 11 aña
12 pa 17 aña.
Un atardi cu ta priminti di kibra tur expectativa unda e talent di nos muchanan lo resalta.
Nos tin cu menciona cu hopi cantante hoben cu ta participando y destacando den festivalnan nacional manera entre otro den Festival di un canto na nos Himno y Bandera, Festival di Dande y otro festivalnan, ta cantantenan cu a debuta pa prome biaha den Kids & Teens Christmas Song Festival.
Un danki grandi ta bai na Aruba Bank, Prins Bernhard Cultuursfonds Caribisch Gebied, Setar N.V., Departamento di Cultura cu ta hasi e tremendo festival aki posibel y na tur comerciante cu ta juda cu premionan y cos dushi pa tur nos participantenan.