Home Local Exprodesk ta invita nos comerciantenan pa participa na ‘Reaching New Frontiers!’

Exprodesk ta invita nos comerciantenan pa participa na ‘Reaching New Frontiers!’

SHARE

 

 

ORANJESTAD – Departamento di Asuntonan Economico, Comercio y Industria pa medio di su unidad Exprodesk y segun maneho economico di Minister di Economia, Comunicacion y Desaroyo Sostenibel, Sr. Geoffrey Wever, ta invita tur empresario local y (futuro) exportadornan riba diabierna 11 november di 9.00 am pa 12.30 pm na Hilton Aruba Caribbean Resort & Casino. E evento aki, cu lo conmemora e di 5 aña di existencia di Exprodesk, lo concentra riba informacion practico y extenso pa e participantenan riba ‘doing business’ cu e mercadonan den Norte America, Europa, Caribe y Asia.

 

E evento aki ta pa esnan cu tin interes den amplia nan negoshi den futuro riba mercadonan internacional. Esnan cu kier combersa cu expertonan for di e mercadonan di Norte America, Europa, Caribe y Asia riba oportunidadnan comercial, y esnan cu kier haya mas informacion di productonan traha na Aruba. Pa medio di charlanan y despues e sesionnan Business2Business, lo haya informacion general y personaliza di expertonan comercial, empresarial, huridico, logistico y mas.

 

Participacion ta gratis. Solamente mester registra, pasobra cuponan ta limita. Join nos y registra via e siguente link: https://cutt.ly/New-Frontiers 

 

Exprodesk a inicia na Departamento di Asuntonan Economico, Comercio y Industria riba 11 di September 2017, pa promove exportacion. Exprodesk a sa di haci e tarea aki exitosamente cu seminarionan cu temanan al caso pa e exportador, cu proyectonan den cooperacion cu organisacionnan di diferente paisnan (e.o. Hulanda, Colombia y Republica Dominicana), y cu entrenamento extenso di gruponan di enfoke pa un plan di exportacion y señalamento di retonan den e clima empresarial pa un maneho di exportacion mas atractivo.

 

Riba 11 november benidero lo celebra e existencia y exito di Exprodesk, durante un evento cu lo inicia oficialmente door di Minister Geoffrey Wever di Asuntonan Economico, Comunicacion y Desaroyo Sostenibel. Otro oradornan local y internacional durante e dia aki lo ta Sr. Manuel Pila (experto mercado Norte America), Sra. Michelle Low Chew Tung (experto mercado Asia), Sra. Taiana Mora-Ramis (experto mercado Republica Dominica), Sra. Soelan Daal (experto mercado Europa), Sr. Sam Kruiner (experto mercado Caribe), Sra. Lay Hing de Kort-Yee y Sr. Frits Israel (expertonan riba exportacion).

 

Pa mas informacion por tuma contacto cu Sra. Sharon Meijer di Exprodesk na s.meijer@deaci.aw