Fundacion CINEARUBA ta preparando e di tres edicion di Playa Film Festival cu lo enfoca riba e 200 aña di existencia di Oranjestad. Esaki lo wordo haci pa medio di un competencia di documentario cortico basa riba e 200 aña di Oranjestad. Tur persona por participa na e competencia aki.
Un di e rekisitonan ta cu e duracion di e mini documentario mester ta entre minimo 5 minuut y maximo 15 minuut. E topico di e documentario ta historianan di Oranjestad. Ta recomenda pa enfoca riba un storia pa documentario por ehempel e historia di Fort Zoutman. Ta importante pa ilustra e pasado, presente y futuro por ehempel e inicio di Fort Zoutman y su desaroyo te cu awor, y tambe kico por spera di Fort Zoutman den futuro. Un panel di hurado lo saca e ganado di e miho documentario cortico.
Ademas di e categoria di documentario cortico lo bin bek cu e categoria di Kingdom of Shorts. E categoria aki ta enfoca riba peliculanan cortico di ficcion. Kingdom of Shorts ta unicamente habri pa e siguiente paisnan: Aruba, Bonaire, Curacao, Saba, Sint Eustatius, Sint Maarten y Hulanda. Ta recomenda pa incribi peliculanan cortico di duracion entre 5 pa 15 minuut. Tur e peliculanan den Kingdom of Short lo ta competiendo pa e premio di hurado pa miho pelicula di Kingdom of Shorts.
E di tres categoria ta pa peliculanan largo. E categoria aki ta conta tanto pa peliculanan local y peliculanan internacional. Ta prefera peliculanan di ficcion of documentario cu un duracion di 60 pa 90 minuut. Un panel di hurado lo eligi e miho pelicula largo.
E ultimo categoria ta pa peliculanan cortico di ficcion of documentario internacional exluyendo Aruba, Bonaire, Curacao, Saba, Sint Eustatius, Sint Maarten y Hulanda cu ta forma parti di Kingdom of Shorts. E peliculanan aki tambe tin un duracion di 5 pa 15 minuut y un panel di hurado lo eligi e pelicula ganado.
Tin diferente dianan pa submit un pelicula, pero e dia final ta 30 di april 2023. Despues di e fecha aki no ta posibel mas pa submit un pelicula. Riba prome di juni lo notifica tur esnan cu a submit nan pelicula si nan pelicula ta forma parti di e seleccion oficial di Playa Film Festival 2023. E di tres edicion e festival lo tuma luga for di 7 pa 9 di juli 2023.
Pa submit un pelicula bishita www.playafilmfestival.com. Riba e plataforma di FilmFreeway lo por lesa mas tocante e reglanan di Playa Film Festival. Playa Film Festival ta un proyecto di fundacion CINEARUBA cu colaboracion di Ateliers ‘89.
