Home Sports Exitoso Campeonato “Open Aruba 2022”

Exitoso Campeonato “Open Aruba 2022”

SHARE

Oranjestad:
Recientemente a tuma luga na Centro Deportivo Libertador Betico Croes e campeonato “Open Aruba 2022” di Aruba Karate Bond (AKB) den colaboracion cu Aruba Sport Unie (ASU). A habri e mainta cu un bunita desfile di e tres scolnan miembro di AKB, esta RyuBu-Kai Aruba (bou di presidencia di “sensei” Felix Tromp), Shotokai Aruba (bou presidencia di “sensei” Alberto Gonzalez Lujan) y SKIF Aruba (bou presidencia di “sensei” Gustavo Velasquez). Na e apertura di e campeonato a tuma tambe un minuut di silencio pa conmemora e miembro di directiva di AKB y miembro activo di SKIF Aruba, señor Silvano de Castro q.e.p.d.
Entrega di certificado
Despues a sigui cu entregamento di e certificadonan na e arbitro- y coachnan cu a pasa nan examen. Un pa un nan a wordo yama. Nan a ricibi nan certificado for di man di “sensei” Felix Tromp. Palabra di pabien ta bay pa: Shawn-Carl Solagnier, Tiana Tromp, Juan David Velasquez, Genesis Tromp, Jeshua Mejia, Olga Guaitarilla, Mariana Rodriguez, Edith Shaw Vargas, Bachera Marin, Andrés Piña, Lipika Motwani, Frederik Quandus, Jean Pierre Winterdaal, Jesus Calderon, Kyran Tromp y Zillion Brugés. Hopi bunita tabata e hecho cu e miembronan di seleccion 2022 tambe a pasa e examen exitosamente. Ta trata aki di Jeshua Mejia, Kyran Tromp y Zillion Brugés kende awor tin hopi bon conocemento di e reglamento di e Organisacion Mundial di Karate (WKF).
Registracion y resultado
Registracion pa participa na e campeonato “Open Aruba 2022” a sosode conforme e informacion riba e flyer di invitacion, unda a duna oportunidad pa registra te 9 di october 2022. Despues di dicho fecha no a permiti ningun registracion mas. Cu participacion di 54 karateka den nan respectivo categoria, e campeonato a dura practicamente henter dia. E publico por a goza di momentonan sublime unda por ehempel e “kumite” (bringamento) dentro di e categoria Masculino 12,13-14 aña, Masculino 16 -17 aña y e categoria Femenina Senior a causa hopi furor. Directiva di Aruba Karate Bond ta felicita e medayistanan cu nan tremendo resultado. Finalmente Aruba Karate Bond ta gradici Aruba Sport Unie, Stichting Sportsubsidie Aruba, Lotto pa Deporte, Comité Olimpico Aruba, tur instructor di karate, tur boluntario, tur mayor y tur karateka.