Home » MINISTER MADURO A CERA CONOCI CU DIRECTOR GENERAL DI RELACION INTERNO Y DI REINO NOBO SR ROALD LAPERRE

MINISTER MADURO A CERA CONOCI CU DIRECTOR GENERAL DI RELACION INTERNO Y DI REINO NOBO SR ROALD LAPERRE

by Admin
0 comment 74 views

Mester trankilidad pa asina por traha na bienestar di Aruba

Siman pasa Minister Maduro cera conoci cu sr. Roald Laperre kende ta e Director General di Relacion Interno y di Reino (DGKR) nobo. Sr Laperre ta na cabes di e departamento cu ta coordina e relacion entre Aruba, e otro Paisnan den Caribe Hulandes y Hulanda. Durante e reunion a trata diferente punto cu tin di haber cu e situacion financiero di Aruba. Minister Maduro a haci un apelacion na e DGKR pa tene cuenta cu Aruba su interesnan pa por yega na e trankilidad necesario den Reino pa nos por traha na bienestar di Aruba.

E ‘aanwijzing’ y Aruba su ‘zienswijze’
Durante e reunion a combersa riba e desicion reciente di Conseho di Minister di Reino RMR pa no duna Aruba un ‘aanwijzing’ manera conseha pa CAFT. Conforme ley, Aruba a manda su opinion den e ‘zienswijze’ pa RMR, pero den nan desicion RMR no a referi na e puntonan huridico y financiero den e ‘zienswijze’ cu ta contra-aresta e ponencianan di CAFT y ta pone luz riba e forma incorecto cu trata cu e responsabilidad constitucional den Reino Hulandes. E madatario a haci un apelacion na sr. Laperre pa tene cuenta cu Aruba su ‘zienswijze,’ ya cu esaki ta conta tambe pa e discucion nos dilanti riba presupuesto pa aña 2023.

Condicion di pago di debe na Hulanda
Minister Maduro a pidi atencion special pa e dialogo riba e condicionnan pa paga Hulanda bek e fiansa cu a wordo haci pa Aruba por surpasa e pandemia di COVID-19. Contrario na otro Paisnan den Reino, Aruba tin creditornan riba mercado internacional y pesey ta importante pa nos por tin un bista riba e efecto cu e debe crea cu Hulanda lo tin pa e capacidad di pago di Aruba. Te ainda e dialogo aki no a tuma luga, y Aruba mester por duna su creditornan claridad pa aña 2023 bay dilanti.

Evalua e supervision financiero di CAFT
Un otro punto necesario pa trece trankilidad ta pa e supervision financiero di CAFT wordo evalua. Desde aña 2015 cu e ley di LAFT cu ta rigi e supervision financiero a drenta na vigor, nunca esaki a wordo evalua. Sigur awor cu Hulanda ta exigi pa e supervision financiero wordo hinca den un Rijkswet RAFT, ta hopi importante pa haci un evaluacion enves di djies sigui cu un supervision no optimal via un bachi huridico diferente.

Mester trankilidad pa asina por traha na bienestar di Aruba
Minister Maduro a enfatisa cu sigur despues di un pandemia manera esun di COVID-19, e ta importante pa na Aruba y den Reino por tin trankilidad. Esaki ta necesario pa por enfrenta e retonan nos dilanti y pa por tin e espacio necesario pa por traha na bienestar di Aruba. E lunanan tras di lomba tabata tin basta intrankilidad debi na e menasa di ‘aanwijzing’ siendo cu tur esaki por a wordo evita si tabata tin mas comprension y respet pa otro den Reino Hulandes. Dialogo en persona ta yuda crea claridad y trankilidad, y pesey na final di e reunion Minister Maduro a desea sr. Laperre hopi exito cu e reto nobo como DGKR y e mandatario a gradici’e di adelanta pa tur esfuerso cu lo wordo haci na bienestar di Aruba.

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio