Watty Vos Boulevard/ Bushistraat, Ponton: Diasabra algo despues di 6’or y mey di atardi, alarma a wordo bati pa Nissan Sentra cora kima, cu tabata coriendo riba e caminda di direccion contrario (spookrijder) riba Watty Vos Boulevard. E spookrijder a wordo señala un poco pabou di e rotonde di Tanki Leendert. E tabata bayendo direccion pabou riba e caminda contrario y riba dje e tabata coriendo lus paga.
E patruya di polis cu a topa cu ne riba caminda y a bira bay su tras cu zwaailicht y sirena, pero ni asina e chauffeur no a respeta ordo di polis y a sigui core. Mesora a cuminsa un persecusion, asistencia di mas patruya di polis a wordo pidi, nan a sigui e Nissan Sentra cora kima den Madiki Kavel, e la bay direccion di Ponton y den Bushistraat e la dal contra un patruya di polis. E chaffeur a para e auto na un compleho di apartamento den e caya aki.
E homber a resisti fuertemente su detencion, pero e agentenan a logra domine y a pone riba vloer. E homber tabata tin su uniform di trabou bisti. E la wordo deteni y transporta pa warda di polis. E Nissan Sentra a keda confisca y takelwagen a hib’e warda di polis. Mirando cu e chauffeur a dal contra e auto di polis, Polis di trafico mester a presenta pa tuma datos.
