Home Local Como parti di e strategia di diversificacion Oficina di Turismo Aruba trahando riba mercado Latino America

Como parti di e strategia di diversificacion Oficina di Turismo Aruba trahando riba mercado Latino America

SHARE

Recientemente un delegacion di Oficina di Turismo Aruba, tabata na Bogota, Colombia pa cumpli cu un agenda amplio di reunion y otro encuentronan importante cu coleganan di A.T.A. Latino America (LATAM).

E siman di reunion a habri cu un encuentro interno entre A.T.A. Aruba y A.T.A. LATAM. Despues a enfoca riba 2022, cu agencianan tambe presente. Ta premira cu lo sera 2022 cu un total di 85.000 bishitante di e region. A sigui cu discusion di strategia pa 2023 y di accionnan tactico cu e mercado a defini. E meta pa 2023 ta pa atrae e bishitante cu ta gasta mas y pa atrae un total di 3% mas bishitante di e region. A discuti presupuesto pa 2023 y strategia pa e.o. 5 mercadonan di LATAM (Brazil, Argentina, Chile, Peru y Colombia) a wordo discuti.

Mester remarca cu esaki tabata e ultimo reunion di Miriam Dabian como Directora di Oficina di Turismo Latino America. Un encuentro special, bon atendí, a permiti A.T.A. gradici y enfatisa compromiso di Aruba cu e mercado!

A sostene tambe reunionnan, hunto cu aeropuerto di Aruba, cu Avianca, Wingo y Sarpa. Ta sigui enfoca riba re-establece capasidad cu a mira na 2019. Ta sigui tambe enfoca riba hubs nobo na Colombia, manera a bin ta e caso e aña aki. Despues di e colapse di e mercado Venezolano, Latino America a trece rondo di 100.000 bishitante pa aña (durante añanan no pandemico). Ta sigui re-establece e mercado aki, despues di e pandemia.

Pa 2023 A.T.A. ta premira resultadonan positivo como resultado di e diferente factornan cu lo traha riba dje, entre otro, strategia, mercadeo y mas conexion aereo.