Home Local Gradiciendo pa casi 40 aña den e industria di turismo Conmovedor despedida...

Gradiciendo pa casi 40 aña den e industria di turismo Conmovedor despedida di Miriam Dabian Actual Directora di A.T.A. Latino America

SHARE
????????????????????????????????????

 

Recientemente a tuma lugar na Bogota, Colombia, e despedida di Miriam Dabian, kende despues di un carera exitoso di casi 40 aña, a dicidi pa clausura e ciclo aki y dedica tempo na su mes y famia. Den un recepcion masha ameno a gradici Miriam pa tur su labor den e industria.
Riba un 8 di maart 1983, Dia International di Hende Muher, Miriam a cuminsa traha pa Aruba Tourism Authority. Durante di su trayectoria cu A.T.A., Miriam a fungi den varios puesto como tambe encarga cu varios proyecto.
Recientemente Miriam a comparti un email cu A.T.A. titula; ‘cerrando ciclos’, caminda cu Miriam tabata conta cu e no ta trata di su preparacion pa bai pero mas bien planea e clausura di casi 40 aña di su bida profesional como tambe personal.
Miriam ta comenta cu ‘cerrando ciclos’ kiermeen cu cada cambio den bida mester haci un evaluacion, mester gradici, y haci un limpiesa interno. “Mi ta agradeci na bida cu a dunami e oportunidad pa traha na A.T.A., pa a conoce asina tanto hende bunita, cu mi por a biaha y mi ta yama danki pa mi coleganan. Mi ta bayendo sin tristesa pero contento di por a cumpli cu mi deber y trabao”.
CEO di Aruba Tourism Authority, Ronella Croes, tabata presente y a hiba un speech conmovedor di su experencia cu Miriam; “Pa nos tambe e ta clausura di un ciclo. Pa nos na oficina di A.T.A. ta dificil pa imagina cu despues di casi 40 aña Miriam lo stop di traha cu oficina di turismo. Pero igual na Miriam, nos tambe ta agradecido na Miriam pa su lealtad, determinacion, creatividad y perseverancia”.
Miriam tabata tin y lo continua di tin un rol importante den e formacion di demas colega y otro profecionalnan den e industria di turismo atraves di ‘La academia de Miriam’, manera cu e mes ta yame, semper enfocando riba e compartimento di conocemento y su experiencia.
Den nomber di Aruba Tourism Authority na Aruba, Latino America, Merca y Europa nos kier a gradici Miriam pa tur locual cu el a significa pa turismo y LATAM, su amor pa e trabao y su pasion pa e isla cu semper el a demostra unda cu el a bai a briya durante decadanan. Danki pa tur conocemento y hopi exito y felisidad!