Home » ELMAR A HACI INVESTIGACION Y TA SPLICA Y BRINDA AREGLO DI PAGO

ELMAR A HACI INVESTIGACION Y TA SPLICA Y BRINDA AREGLO DI PAGO

by Admin
0 comment 87 views

Oranjestad, Aruba (28 oktober 2022) – ELMAR a haci un investigacion di e proceduranan cu a wordo ehecuta pa cu e ultimo recibo di cobransa di luna di September, 2022. ELMAR ta consciente cu e prijs di coriente nobo tabata tin un impacto considerabel den nos comunidad. Manera ta conoci, pa motibo di aumento di prijs di energia na nivel internacional, e companianan di utilidad a haya nan mes obliga pa ahusta nan tarifa pa asina nan por sigui funciona pa sirbi nos comunidad y economia di Aruba. Riba peticion di Ministerio di Energia y Utilities, ELMAR a haci un revision di tur procedura y calculacion haci di e recibo di September, cual tabata e di cinco luna di September mas cayente den 143 aña cu ta midi temperatura na mundo.

Na prome lugar e situacion di tempo; durante e luna ey di September e consumo di kWh a subi considerablemente pa motibo di e inmenso temperature cayente. Pa colmo durante di e temporada aki biento tambe a cay pa motibo di tormenta y horcan den region, e medio ambiente riba nos isla a bira mas calor cu normal y sofocante. E factornan aki a contribui na un consumo mas halto di coriente pa haya alivio di e calor excesivo. P’esey e consumo di coriente durante e luna di september 2022 a registra un record nunca bisto di ‘peak load’ di megawatt cu a wordo publica door di ELMAR y WEB.

Riba e asunto di factura; ELMAR a haci un investigacion riba e parti administrativo. Durante e investigacion ELMAR no a encontra ningun facturacion di coriente cu no ta conforme e aumento di prijs di coriente di 24%, esaki ta pa locual ta e tarifa. E consumo total na kWh ta defini e prijs total cu e cliente mester paga a base di cada bracket residencial. ELMAR a haci un investigacion tambe riba e lesamento di meter (funcionamento di e meter) y tampoco no a encontra ningun meter di ELMAR cu no a pasa e ‘nauwkeurigheid’ test. Tur meter di ELMAR ta certifica cu un ‘nauwkeurigheid’ test for di e fabricante. Si encaso bo ta di opinion cu bo a wordo factura mas cu e aumento di prijs di coriente di 24%, por fabor pasa na cualkier sucursal di ELMAR, of por tuma contacto cu nos departamento di servicio di cliente via email na [email protected], of yama na 523-7100.

Tocante di e dianan di cobransa; ELMAR ta haci uzo di un ‘third party’ pa lesamento di meter di coriente. Un grupo grandi di cliente a wordo factura pa un periodo di 33 dia di consumo, door cu e fecha di lesamento di meter durante September 2022 a cay riba un weekend.
E fecha di lesamento di meter ta depende si e fecha ta cay riba dianan di fiesta of no riba dianan di trabou. Pa es motibo aki e periodo di consumo por varia entre 28 dia pa 33 dia cu un total di 365 dia di consumo. ELMAR a logra yega na un acuerdo nobo cu e ‘third-party’ pa nan cuminsa traha durante dianan di fiesta of no dianan usual di trabou. Asina por mantene e periodo di consumo te cu un maximo di 31 dia di awo en adelante.
Tocante areglo di pago; ELMAR semper a ofrece un solucion na nos clientenan cu ta haya nan mes den dificultad pa por cumpli cu pago. Pa acomoda e casonan critico di luna di September 2022, nos clientenan por cera un acuerdo di pago pa asina cubri e retraso den mas luna, pa evita asina cu por desconecta e meter di coriente. Pa cera e acuerdo aki, nos clientenan por pasa libremente na ELMAR, of bishita www.elmar.aw/payment-arrangement-application/areglo-di-pago.

ELMAR su investigacion lo sigui y ta haci un apelacion na e comunidad di Aruba pa sea consciente cu consumo di coriente. Tuma un momento tur dia pa revisa bo cas y paga
aparatonan cu no mester ta cendi of den uzo.

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio